“ამ მდგომარეობაში მიხეილ სააკაშვილის საპატიმროში ყოფნა არა თუ მიზანშეწონილი – ეს არის დანაშაული!” – კობა ნაყოფია

პარლამენტის ფრაქციის ,,ერთიანი ნაციონალური მოძრაობა – ძალა ერთობაშია“ წევრმა, პარტიის აღმასრულებელმა მდივანმა, კობა ნაყოფიამ, საქართველოს მე-3 პრეზიდენტის მონახულების შემდეგ, მედიასთან განაცხადა, რომ მიხეილ სააკაშვილს აღენიშნება ნევროლოგიური პრობლემები. ოპოზიციონერი ლიდერმა ასევე აღნიშნა, რომ ექსპრეზიდენტი ახლა მუშაობს ეკონომიკურ პროგრამაზე, რომელსაც საზოგადოება მალე გაეცნობა:

,,სააკაშვილს ნამდვილად აღენიშნება ნევროლოგიური პრობლემები. ეს ისედაც, ასე ვთქვათ, ვიცით, რომ მთელი პერიოდის განმავლობაში, როდესაც ის შიმშილობდა, სერიოზული ზიანი მიადგა მის ჯანმრთელობას. გარდა ამისა, კარგად გვახსოვს ასევე, მის მიმართ არადამიანური მოპყრობის და წამების ფაქტები.

მე მინდა ვუთხრა ,,ქართული ოცნების“ ხელისუფლებას, რომ მათივე ინტერესში უნდა იყოს და ამისთვის სერიოზული ყურადღება არის მისაქცევი. იმიტომ, რომ ამ მდგომარეობაში ამ ადამიანის აქ ყოფნა, რა თქმა უნდა, არა თუ მიზანშეწონილი – ეს არის დანაშაული!

მიხეილ სააკაშვილი ისედაც უჩიოდა ძილის პრობლემებს და ახლა იძახის, რომ დროც არ მაქვსო. იმიტომ, რომ ძალიან ბევრს მუშაობს.

ის ახლა მუშაობს ეკონომიკურ პროგრამაზე, რომელსაც ძალიან მალე წარვუდგენთ საზოგადოებას. ამით არის ძირითადად ახლა დაკავებული.

თუმცა, მან თქვა, რომ თუ არ იქნებიან ექიმები დაშვებული მასთან, ის პრაქტიკულად იძლებული გახდება, რომ ისევ მიმართოს პროტესტის უკიდურეს ფორმას და დაიწყოს შიმშილობა“, – განაცხადა კობა ნაყოფიამ.

ავტორი
ნინი ხიჯაკაძე