სახელმწიფო ინსპექტორი ლონდა თოლორაია მედიასთან კომენტარს აკეთებს პარლამენტში8 შეტანილ საკანონმდებლო ინიციატივასთან დაკავშირებით სახელმწიფო ინსპექტორის სამსახურის გაუქმების თაობაზე. ლონდა თოლორაია იმედს გამოთქვამს, რომ საქართველოს პრეზიდენტი, სალომე ზურაბიშვილი გამოიყენებს ვეტოს უფლებას:
,,როგორც ჩანს, საქართველოს პარლამენტს ძალიან მტკიცედ აქვს გადაწყვეტილი ამ კანონის მიღება. ჩემი მიზანი ახლა დარჩა ის, რომ მაქსიმალური დისკომფორტი შეექმნათ მათ იმ არადემოკრატიული, ადამიანის უფლებებზე არაორიენტირებული და დისკრიმინაციული კანონის მიღების გამო, რომელიც ალბათ დღეს ან მაქსიმუმ ხვალ იქნება მიღებული.
მე ძალიან დიდი იმედი მაქვს, რა თქმა უნდა, რომ პრეზიდენტი ვეტოს დაადებს ამ კანონს. ჩვენ მოვისმინეთ გუშინ კომენტარი, რომ პარლამენტი შეეგებება ამ ვეტოს, ანუ მათ არ აინტერესებთ არც პრეზიდენტის არგუმენტები, არა მხოლოდ ჩვენს ინსტიტუტს არ სცემენ პატივს, არამედ გუშინ ამ კომენტარით პრეზიდენტის ინსტიტუტსაც არ სცეს პატივი. მე პრეზიდენტის განცხადება მაფიქრებინებს, რომ იგი ამ მნიშვნელოვან ბერკეტს გამოიყენებს.
დაწყებულია ძალიან ბინძური კამპანია ბოტ-ტროლების საშუალებით ლონდა თოლორაიას წინააღმდეგ. როგორც წესი, ეს კამპანია იწყება მაშინ, როდესაც ყველანაირად სამართლებრივი და მორალური ბრძოლის წაგება ხდება. უბრალოდ მე მართლა მქონდა იმედი, რომ რაღაცა წითელი ხაზები კიდევ დარჩა, რომლის იქითაც გადასვლა აღარ შეიძლებოდა, მაგრამ როგორც ჩანს არანაირი ასეთი ხაზები არ არსებობს“, – განაცხადა ლონდა თოლორაიამ.
ავტორი
ნინი ხიჯაკაძე
