დღეს, გორის ჰოსპიტალში, საქართველოს ორი პრეზიდენტის – მიხეილ სააკაშვილისა და გიორგი მარგველაშილის შეხვედრა შედგა. როგორც მარგველაშვილმა განაცხადა, პუტინის უმთავრეს ინტერესშია, რომ მიხეილ სააკაშვილი იყოს ქართველების მიერ დაპატიმრებული და გამოკეტილი:
,,პირველ რიგში, შეხვედრის ძირითადი ნაწილი, ჩვენ ვსაუბრობდით იმ უსაფრთხოების გარემოზე, რაც საქართველოს წინაშე არის ამ დღეებში. დეტალურად გავუზიარეთ ერთმანეთს და მიმოვიხილეთ საქართველოს ირგვლივ შემნილი ძალიან რთული გეოპოლიტიკური მდგომარეობა, რომლის მთავარი აქტორიც არის რუსეთი.
რუსეთის ფედერაციის აგრესიული პოლიტიკა რეგიონში, რომელიც უშუალოდ უკავშირდება, მათ შორის, მიხეილ სააკაშვილისთვის და ჩვენთვის ძალიან ახლობელ უკრაიანას, ავტომატურად სარკისებურად აისახება საქართველოს უსაფრთხოების გარემოზე.
ვსაუბრობდით იმის თაობაზე, რომ ჩვენი ვალია, როგორც ამ ქვეყნის ყოფილი პრეზიდენტების და ყოფილი მთავარსარდლების, გავიზიაროთ ეს ღრმა შეშფოთება და ქალბატონ სალომესთან ერთად, როგორც ასევე, ჩვენი ქვეყნის მთავარსარდალთან და პრეზიდენტთან, ვიღვაწოთ იმ მიმართულებით, რომ რაღაც მომენტში მთელ დაპირისპირებას, რაც ჩვენს შორის არსებობს შეიძლება ძალიან მძიმე გამოწვევა დაუდგეს წინ, სადაც ჩვენ ყველას უნდა გვქონდეს გაერთიანების ფუნდამენტი და საფუძველი.
ამ თვალსაზრისით, ბუნებრივია და ამას უკვე ჩემგან ვამბობ, პიროვნულად – ადამიანი, რომელიც აქ არის პატიმრობაში, ჩემთვის არის ხაზგასმით პუტინის პატიმარი და ამას თვალი უნდა გავუსწოროთ, რომ ჩვენ საქართველოში პუტინთან დაპირისპირებაში ერთ-ერთი გამორჩეული ადამიანი და პოლიტიკოსი, არა მარტო საქართველოს კონტექსტში, არამედ სხვა თვალსაზრისითაც, რამდენიც არ უნდა გვქონდეს ჩვენ უთანხმოება ერთმანეთთან ან წარსულში, ან მომავალში – ეს არის საკითხი, რომელიც პუტინის უმთავრეს ინტერესშია, რომ ეს ადამიანი იყოს ქართველების მიერ დაპატიმრებული და გამოკეტილი. ეს არის ჩემი პირადი შეფასება იმ ვითარებისა, განსაკუთრებით იმის მერე, რაც დეტალურად ვისაუბრეთ ჩვენ არსებულ ვითარებაზე.
ვთანხმდებით რა ორივენი, რომ ძალიან სერიოზული გამოწვევის წინაშე არის საქართველო. ჩვენ მიგვაჩნია, რომ პრეზიდენტების და მთავარსარდლების გაერთიანება, ამ თვალსაზრისით შიდა დაპირისპირების ტემპერატურის დაწევა, რომელიც ქალბატონი სალომეს მიერ არის ინიცირებული, გახლავთ უაღრესად მისასალმებელი, დროული და მხარდასაჭერი“, – განაცხადა გიორგი მარგველაშვილმა.
ავტორი
ნინი ხიჯაკაძე
