“ეს არის პატარა დისკოთეკა” – რომან გოცირიძე პრეზიდენტის მიერ დაგეგმილ ღონისძიებასთან დაკავშირებით

,,ნაციონალური მოძრაობის“ პოლიტიკური საბჭოს წევრმა, პარლამენტის დეპუტატმა რომან გოცირიძემ კომენტარი გააკეთა პრეზიდენტის საახალწლო მიღებასთან დაკავშირებით. ოპოზიციონერი ლიდერის შეფასებით, ჯერ უნდა მოხდეს საქმიან ფორმატში შეხვედრა, ხოლო შემდეგ – სადღესასწაულო მიღება:

,,ეს არ არის არავითარი ოფიციალური, ასე ვთქვათ, საქმიანი მიღება. ეს არის პატარა დისკოთეკა, თუ შეიძლება ასე ითქვას. წვეულება, რომელსაც ატარებს პრეზიდენტი ახალ წელს, საშობაოდ, სააღდგომოდ და კიდევ რაღაც დღესასწაულთან დაკავშირებით.

თანაც იმ შენობაში, რომელსაც ულამაზესი ბოქლომი ადევს და მილიონობით ფული იხარჯება მის შენახვაზე, დაცვაზე და ა.შ. შენობა, რომელიც დაიცალა ბიძინა ივანიშვილის ახირების გამო. წელიწადში ერთხელ ასეთი “ალაფურშეტი” იმართება იქ.

საქმიანი შეხვედრა პრეზიდენტთან როდესაც იქნება, ,,ნაციონალური მოძრაობა“ დაჯდება მასთან, მოლაპარაკების მაგიდასთან, სხვა ოპოზიციურ პარტიებთან ერთად. ჯერ რეალური საქმიანი ფორმატი და შემდეგ, ასე ვთქვათ, საახალწლო წვეულება“, – განაცხადა რომან გოცირიძემ.

ავტორი
ნინი ხიჯაკაძე