პარტია ,,ქართული ოცნების“ თავმჯდომარე ირაკლი კობახიძე მწვავე შეფასებებს აკეთებს ,,ერთიანი ნაციონალური მოძრაობის“ მისამართით. მმართველი პარტიის ლიდერს მიაჩნია, რომ პოლიტიკური ვითარების გაუმჯობესების გასაღები არის ენმ-ს დასუსტებაში:
,,დამნაშავე იმუქრება რევოლუციით. დამნაშავე იჯდება ციხეში, მოუწევს მას თავისი სასჯელის მოხდა. ,,ნაციონალურ მოძრაობას“ არავითარი შანსი რევოლუციის, არჩევნების მოგების არ აქვს, ამ ქვეყანაში, ერთი მარტივი მიზეზის გამო – მის უკან არ დგას ხალხი!
უნდა აღიარონ ყველა დანაშაული, რაც აქვთ მათ ჩადენილი: წამების, ღირსების შელახვის, არაადამიანური მოპყრობის, ტერიტორიების დათმობის, მედიის მიტაცების, ბიზნესის რეკეტის ჩათვლით, რასაც ჰქონდა სისტემური ხასიათი. ამის შემდეგ უნდა თქვან, რომ ასეთი დანაშაულების ჩამდენ პოლიტიკოსებს, ბუნებრივია, ადგილი აღარ აქვთ პოლიტიკაში – ეს უნდა აღიარონ. ამის შემდეგ, რა თქმა უნდა, შეიძლება დაიწყოს საუბარი შერიგებაზე. მაგრამ, ვიდრე ამ ადამიანებს – დამნაშავეებს, კრიმინალებს აქვთ პოლიტიკაში დარჩენის ამბიცია, რა თქმა უნდა, შერიგებაზე ლაპარაკი ზედმეტია!
პრეზიდენტს აქვს უფლება სცადოს მაქსიმუმი იმისათვის, რომ გააუმჯობესოს პოლიტიკური მოცემულობა საქართველოში. მას აქვს ამის უფლება, მაგრამ რაც შეეხება პერსპექტივას, მაქვს საკმაოდ მძიმე წარმოდგენა – სწორედ იმის გამო, რომ ვიცნობ ამ ადამიანების ბუნებას.
,,ნაციონალურ მოძრაობა“ სუსტდება მუდმივად, მათ შორის, იმის გამო, რომ წააგეს არჩევნები და იციან, რომ 3 წელი არანაირი არჩევნები აღარ იქნება, იმის გამო, რომ მათი ბელადი არის ციხეში. ,,ნაციონალური მოძრაობა“ უნდა დასუსტდეს და მის დასუსტებაში არის პოლიტიკური ვითარების გაუმჯობესების გასაღები“, – განაცხადა ირაკლი კობახიძემ.
ავტორი
ნინი ხიჯაკაძე
