პარლამენტის ფრაქციის ,,ერთიანი ნაციონალური მოძრაობა – ძალა ერთობაშია“ წევრი ლევან ხაბეიშვილი პარტიის ოფისში გამართულ ბრიფინგზე საგანგებო განცხადებას აკეთებს. ოპოზიციონერი ლიდერის განმარტებით, მას შემდეგ, რაც ხელისუფლება შეიცვლება, სახელმწიფოსგან კონპენსაცია გადაეცემა ყველა იმ სამოქალაქო აქტივისტს, რომელიც დააკავეს ან დააჯარიმეს სიტყვის და გამოხატვის თავისუფლებისთვის:
,,გამოხატვის, სიტყვის თავისუფლებისთვის უკანონოდ, ფაქტობრივად ყველა აქციაზე აკავებენ და ეს გახადა ,,ქართულმა ოცნებამ“, რეჟიმმა ყოველდღიურ მოვლენად. ყოველგვარი მტკიცებულებების გარეშე, უბრალოდ აზრის გამოხატვისთვის აკავებენ აქტივისტებს. მერე ამ აქტივისტების ნაწილს რამდენიმე დღე უწევთ ციხეში გატარება. თუ ციხეში არ უშვებენ, მაშინ აჯარიმებენ ათასობით ლარით.
კარგად იცის საზოგადოებამ, რომ გარდა ადმინისტრაციული წესით დაკავებისა, ,,ქართული ოცნება“ ხშირ შემთხვევაში ამ ადამიანებზე ღძრავს სისხლის სამართლის საქმეებს. დიდ ნაწილს უწევს ამ გამოძიებაზე წლობით სიარული, ციხეში ყოფნა.
ახლა, როცა ჩვენ ბრიფინგს ვატარებთ რამდენიმე ჩვენი თანამებრძოლი არის ციხეში უკანონოდ გამოკეტილი, მხოლოდ იმიტომ, რომ ისინი აპროტესტებენ უსამართლობას, სიტყვისა და გამოხატვის თავისუფლებისთვის აღკვეთილი აქვთ თავისუფლება.
შესაბამისად, ,,ერთიან ნაციონალურ მოძრაობაში“ მიღებულია გადაწყვეტილება: როგორც კი შეიცვლება რეჟიმი, ყველა სამოქალაქო აქტივისტი, ყველა ადამიანი, რომლებიც დაკავებულები იყვნენ პოლიტიკური ნიშნით – აქციაზე სიტყვის და გამოხატვის თავისუფლებისთვის იქნენ დაჯარიმებულები – ყველა ეს ჯარიმა იქნება ჩამოწერილი და პლიუს ამას, მათ გადაეხდებათ კონპენსაცია. მინიმუმ ეს იქნება ორმაგი, რასაც დღეს ,,ქართული ოცნების’’ ხელისუფლება იყენებს ადამიანების სადამსჯელოთ.
ასევე, ყველა ადამიანი, ვინც ამ დროის განმავლობაში იყო რეჟიმის მსხვერპლი, აქციაზე უკანონოდ დააკავეს და ყოველგვარი მტკიცებულების გარეშე ჰყავდათ ციხეში ან ჰყავთ, როგორც კი შეიცვლება რეჟიმი – ყველა ეს საქმე იქნება ინდივიდუალურად გადახედილი და რა თქმა უნდა, მათაც და მათი ოჯახის წევრებსაც სახელმწიფოსგან გადაეხდება კონპენსაცია.
არ შეიძლება არ აღინიშნოს მეორე მხარე, ვგულისხმობ მოსამართლეებს და პოლიციელებს, რომლებიც პოლიტიკური ნიშნით იღებენ გადაწყვეტილებას. მეგობრებო, თქვენ უნდა იცოდეთ, რომ როცა მტკიცებულებების გარეშე, სიტყვის და გამოხატვის თავისუფლების წინააღმდეგ მიდიხარ – თქვენ ჩადიხართ სისხლის სამართლის დანაშაულს“, – განაცხადა ლევან ხაბეიშვილმა.
ავტორი
ნინი ხიჯაკაძე
