ადვოკატი დიმიტრი საძაგლიშვილი კონკრეტულ განმარტებებს აკეთებს მიხეილ სააკაშვილის საქმესთან დაკავშირებით. მისი განცხადებით, გაგრძელდება ქმედითი ნაბიჯების გადადგმა, რითაც დადასტურდება, რომ საქართველოს მე-3 პრეზიდენტი რეჟიმის მხრიდან გახდა არაადამიანური მოპყრობის მსხვერპლი:
,,ჩვენ გავაგრძელებთ ყველა იმ ნაბიჯის გადადგმას, რითაც შეიძლება დავადასტუროთ, რომ მიხეილ სააკაშვილი სახელმწიფოს მხრიდან, რეჟიმის მხრიდან გახდა არაადამიანური მოპყრობის მსხვერპლი და ჩვენ ვნახეთ უკვე პირველი წარმატება ამ გზაზე, როდესაც სახელმწიფო ინსპექტორის სამსახურმა დაადგინა დარღვევის 8 ფაქტი, იუსტიციის სამინისტროს და პენიტეციური სამსახურის მხრიდან, მიხეილ სააკაშვილის პერსონალური ინფორმაციის უკანონო მოპოვება-გასაჯაროებასთან დაკავშირებით და ასევე, მისი ღირსების შემლახველი მოქმედებების განხორციელებასთან დაკავშირებით.
ალბათ, ყველაზე უპრიანია, რომ ჯერჯერობით დაველოდოთ დასკვნებს, გავეცნოთ მათ შინაარსს და იმის მიხედვით მივიღოთ გადაწყვეტილება, თუ რა მიმართულებით შეიძლება გამოვიყენოთ.
რაც შეეხება იუსტიციის მინისტრის განცხადებას, რეალურად სახელმწიფო ხელისუფლების წარმომადგენლები გადაწყვეტილებას უნდა იღებდნენ შესაბამისი დარგის სპეციალისტების, ანუ ექიმების მიერ მომზადებული დოკუმენტების საფუძველზე და არა პოლიტიკური შინაარსის დღის წესრიგის გამო, რაც არაერთხელ მოხდა მიხეილ სააკაშვილთან მიმართებაში, როდესაც ფაქტობრივად ერთხმად ითხოვდნენ ექიმები მის გადაყვანას კერძო კლინიკაში. ვნახეთ, რომ ხელისუფლებამ მიხეილ სააკაშვილზე შურისძიების მიზნით და მასზე არაადამიანური მოპყრობის განხორციელების მიზნით, ის გადაიყვანა არა კერძო კლინიკაში, არამედ გლდანის მე-18 დაწესებულებაში“, – განაცხადა დიმიტრი საძაგლიშვილმა.
ავტორი
ნინი ხიჯაკაძე
