ნინო ლომჯარიას მიერ წარდგენილ ანგარიშს ეხმაურება მიხეილ სააკაშვილის ადვოკატი დიმიტრი საძაგლიშვილი. მისი განმარტებით სახალხო დამცველის შეფასება, სახელმწიფო ინსპექტორის სამსახურის გადაწყვეტილებასთან ერთად, ადასტურებს, რომ ქვეყნის მე-3 პრეზიდენტის უფლებები უხეშად ირღვეოდა:
,,ჩვენ გვაქვს უკვე უტყუარად, მიხეილ სააკაშვილის უფლებების დარღვევის დადასტურებული ფაქტები, ამ ხელისუფლების მხრიდან. ეს დაადასტურა სწორედ ქართულმა სახელმწიფო ინსტიტუციებმა, რომელიც არ ემორჩილება ბიძინა ივანიშვილს, არის ნამდვილად დამოუკიდებელი და ავლენს ინსტიტუციონალიზმის ნიშნებს.
სახალხო დამცველის შეფასება, სახელმწიფო ინსპექტორის სამსახურის გადაწყვეტილებასთან ერთად, ბუნებრივია, ადასტურებს იმას, რომ მიხეილ სააკაშვილის უფლებები ირღვეოდა უხეშად.
არ უნდა დაგვავიწყდეს ასევე, რომ ამ უფლებების დარღვევაში ჩართულნი იყვნენ პოლიტიკური თანამდებობის პირები, მათ შორის, პირადად იუსტიციის მინისტრი, რომელთა უპირველესი ამოცანა, სწორედ, ადამიანის უფლებებზე ზრუნვა უნდა იყოს“, – განაცხადა დიმიტრი საძაგლიშვილმა.
აქვე გთავაზობთ, სახალხო დამცველის ანგარიშს მიხეილ სააკაშვილის საქმეზე:
,,რაც შეეხება მაღალი საზოგადოებრივი ინტერესის მქონე სისხლის სამართლის საქმეებს,
ბუნებრივია, მიხეილ სააკაშვილის წინააღმდეგ მიმდინარე განხილვები მოექცა ჩვენი ყურადღების ქვეშ.
საქართველოს სახალხო დამცველმა მიხეილ სააკაშვილის მიმართ სამართლიანი სასამართლოს უფლების დარღვევად შეაფასა ფაქტი, როდესაც მას პირველ სამ სასამართლო პროცესზე დაუსაბუთებელი არგუმენტით, ჩვენი აზრით, და უკანონო არგუმენტით არ მიეცა სასამართლოზე დასწრების შესაძლებლობა.
გარდა ამისა ჩვენ მიგვაჩნია, რომ მიხეილ სააკაშვილის ნების საწინააღმდეგოდ, ძალის გამოყენებით შესახლების ამსახველი კადრების გავრცელება წარმოადგენდა პატიმრის პატივის, ღირსებისა და პირადი ცხოვრების ხელშეუხებლობის უფლების დარღვევას და აღნიშნული მსგავსად შეაფასა სახელმწიფო ინსპექტორის აპარატმაც“, – განაცხადა ნინო ლომჯარიამ.
ავტორი
ნინი ხიჯაკაძე
