“ჩვეულ პრაქტიკად ჩამოყალიბდა პოლიტიკური თანამდებობის პირთა მხრიდან ჟურნალისტების მიმართ ცინიკური და აგდებული დამოკიდებულება” – ნინო ლომჯარია

დღეს, სახალხო დამცველმა, ნინო ლომჯარიამ წარადგინა ანგარიში, სადაც ერთ-ერთ მთავარ საკითხად განხილული იქნა მედიაზე თავდასხმის ფაქტები – კონკრეტულად 5 ივლისის საქმე. მისი განმარტებით, 5 ივლისის საქმეზე 45 ჟურნალისტს და ოპერატორს აქვს მინიჭებული დაზარალებულის სტატუსი, ხოლო პროკურატურას ჯგუფური ძალადობის ორგანიზებისა და წახალისების ბრალდებით სისხლის სამართლებრივი დევნა არც ერთი პირის მიმართ არ აქვს დაწყებული:

,,განსაკუთრებით შემაშფოთებელი იყო ის საფრთხის შემცველი და მტრული გარემო, რაც ჟურნალისტების მიმართ ქვეყანაში ბოლო წლების და განსაკუთრებით, ბოლო წლის განმავლობაში არსებობდა. სახალხო დამცველმა იდენტიფიცირება გაუკეთა და აღრიცხა მედიის წარმომადგენლებზე ფიზიკური თავდასხმის ათობით შემთხვევა. აქ არ იგულისხმება მხოლოდ 5 ივლისის მოვლენები.

სამწუხაროდ, ასევე, ჩვეულ პრაქტიკად ჩამოყალიბდა პოლიტიკური თანამდებობის პირთა მხრიდან ჟურნალისტების მიმართ ცინიკური და აგდებული დამოკიდებულება, მათი დისკრედიტაციისკენ მიმართული განცხადებები.

5 ივლისის მოვლენები ასევე ცხადყოფს, რომ საქართველოს ხელისუფლებამ, არა მხოლოდ ვერ აღკვეთა ჟურნალისტების და ზოგადად მოქალაქეების მიმართ ძალადობა, რამაც მათ ჯანმრთელობას და სიცოცხლეს რეალური საფრთხე შეუქმნა, არამედ, უფრო მეტიც, – მაღალი თანამდებობის პირთა დისკრიმინაციულმა განცხადებებმა აღნიშნული ძალადობა წააქეზა კიდევაც.

ჩვენს ხელთ არსებული ინფორმაციით, 5 ივლისის საქმეზე 45 ჟურნალისტს და ოპერატორს აქვს მინიჭებული დაზარალებულის სტატუსი. სამწუხაროდ, 5 ივლისს მომხდარ ძალადობრივ ფაქტებთან მიმართებით პროკურატურას, ჯგუფური ძალადობის ორგანიზებისა და წახალისების ბრალდებით, სისხლის სამართლებრივი დევნა არც ერთი პირის მიმართ არ აქვს დაწყებული. მიუხედავად იმისა, რომ სახალხო დამცველის შეფასებით, საჯაროდ გავრცელებული მტკიცებულებების სულ მცირე 2 პირის მიმართ შესაბამისი ბრალის წარდგენის სტანდარტს აკმაყოფილებს“, – განაცხადა ნინო ლომჯარიამ.

ავტორი
ნინი ხიჯაკაძე