“ძალიან მხნედ არის, ძალიან კარგად ფლობს სიტუაციას, რაც ხდება დღეს საქართველოში და დარწმუნებული არის მისი და ქართველი ხალხის გამარჯვებაში” – კობა ნაყოფია მიხეილ სააკაშვილზე

384

,,ერთიანი ნაციონალური მოძრაობის“ აღმასრულებელმა მდივანმა კობა ნაყოფიამ საქართველოს მე-3 პრეზიდენტის მონახულების შემდეგ კონკრეტული შეფასებები გააკეთა მიხეილ სააკაშვილზე, სასამართლო პროცესსა და საპროტესტო მოძრაობასთან დაკავშირებით:

,,ძალიან მხნედ არის, ძალიან კარგად ფლობს სიტუაციას, რაც ხდება დღეს საქართველოში და დარწმუნებული არის მისი და ქართველი ხალხის გამარჯვებაში – ეს პირველი.

თქვენ იცით ალბათ იუსტიციის სამინისტროს განცხადება, რომელიც პრაქტიკულად დაემუქრა მიხეილ სააკაშვილს და მის მხარდამჭერებს, თუ ასე ვთქვათ, ისევ აქციებს მოვაწყობთ სასამართლოსთან და ა.შ. მოკლედ, მას გადაიყვანენ ისევ გლდანის ციხეში. ეს განცხადება გააკეთა, როგორც მე ვიცი – იუსტიციის სამინისტრომ. მიუხედავად ამისა, მიხეილ სააკაშვილი თავის მხარდამჭერებს მოუწოდებს, რომ ისინი მოვიდნენ და გამართონ აქცია.

გუშინ, როდესაც მას ასამართლებდნენ დარბევაზე, თქვენ ალბათ დაინახეთ, როგორ არბევდნენ სამართალდამცავები მშვიდობიანად მოსულ ადამიანებს, როგორ ასხამდნენ მათ წიწაკის რაღაც სითხეებს და ა.შ. ეს ყველაფერი გუშინ ჩვენ ვიხილეთ ,,ლაივში“.

ამიტომ რაც უფრო მეტნი ვიქნებით, რაც უფრო მეტი ხალხი მივა, მით უფრო ნაკლები იქნება მათი მხრიდან აგრესია. ამიტომ მიხეილ სააკაშვილი თავის მომხრეებს მოუწოდებს, რომ ისინი მოვიდნენ აუცილებლად შემდეგ სასამართლო პროცესზე“, – განაცხადა კობა ნაყოფიამ.

ავტორი
ნინი ხიჯაკაძე

კომენტარები პუბლიკაციაზე