მიხეილ სააკაშვილის ფეისბუქის პირად გვერდზე გამოქვეყნებული პოსტით საქართველოს მე-3 პრეზიდენტი სასამართლო პროცესის გამართვისა და სიტყვით გამოსვლის შემდეგ საზოგადოებას მიმართავს და დარწმუნებით აცხადებს, რომ “ქართველი ხალხი მალე დაასრულებს ივანიშვილის რეჟიმს”:
“მადლობელი ვარ შესაძლებლობისთვის, მიმემართა ჩვენი ხალხისთვის. ყველამ იცის, რომ საქმეები ჩემს წინააღმდეგ შეთითხნილია და მე ციხეში არ უნდა ვიჯდე და კარგად დოკუმენტირებული ფაქტების შემდეგ საერთაშორისო პრაქტიკით დაუყოვნებლივ უნდა გავთავისუფლდე.
დღის ანეკდოტი კი ისაა, რომ სანამ მიტინგის დარბევის ბრალდებით მასამართლებდნენ, “ქართული ოცნება” დიდი აზარტით არბევდა სასამართლოსთან მიტინგს და სრულიად უსამართლოდ აპატიმრებდა მონაწილეებს, მათ შორის, ჩემს მეგობარ გიგი უგულავას, რომელსაც მხოლოდ რამდენიმესაათიანი ძებნის შემდეგ მიაკვლიეს მარნეულში.
რაც არ უნდა ქნას “ოცნებამ”, დღეს, უკვე პირისპირ ჩავხედე თვალებში მათ შიშს და გარდაუვალ დამარცხებას. ეჭვი არ მეპარება, ქართველი ხალხი მალე დაასრულებს ივანიშვილის რეჟიმს!
დიდი მადლობა მხარდაჭერისთვის, არც ერთი ნაბიჯი უკან!” – აცხადებს მიხეილ სააკაშვილი.
