“საათები დაგვჭირდა ჩვენ, რომ მიგვეგნო სად იყო ჩამოყვანილი გიგი” – გიორგი კონდახიშვილმა

ოპოზიციონერი ლიდერი გიგი უგულავა პოლიციამ მიხეილ სააკაშვილის სასამართლოს პროცესის პარალელურად მიმდინარე საპროტესტო აქციის დროს დააკავეს და გადაიყვანეს მარნეულის დროებით იზოლატორში. როგორც მისი ადვოკატი გიორგი კონდახიშვილი აცხადებს, ედავებიან წვრილმან ხულიგნობას:

,,გიგი უგულავა არის აბსოლუტურად უკანონოდ დაკავებული. მას ედავებიან წვრილმან ხულიგნობას და პოლიციის დაუმორჩილებლობას. თითქოსდა მან რაღაც დაარღვია, თითქოს იგინებოდა და აყენებდა შეურაცხყოფას პოლიციის თანამშრომლებს. ასეთი რამ მსგავსი არ ყოფილა, კადრებიც იხილა საზოგადოებამ.

უბრალოდ პოლიციის თანამშრომლებმა იგი დააკავეს და ყველაზე უფრო ნიშანდობლივია, რომ წამოიყვანეს მარნეულში, თბილისიდან დაახლოებით 100 კმ-ში, როდესაც დაკავების იზოლატორები თბილისში არის ცარიელი.

გიგი უგულავას არ ეძლეოდა საშუალება ელემენტარულად, რომ დაკავშირებოდა მისი ინტერესების დამცველ ადვოკატს და ოჯახის წევრებს.

საათები დაგვჭირდა ჩვენ, რომ მიგვეგნო სად იყო ჩამოყვანილი გიგი“, – განაცხადა გიორგი კონდახიშვილმა.

ავტორი
ნინი ხიჯაკაძე