“ეს აღარ არის ბრძოლა ოპოზიციურ პარტიებთან, “ქართული ოცნება” პირდაპირ ებრძვის ქართველ ხალხს” – გიორგი ვაშაძე

პოლიტიკური პლატფორმა “სტრატეგია აღმაშენებლის” თავმჯდომარე, გიორგი ვაშაძე ეხმაურება ბათუმისა და ზუგდიდის საკრებულოებში განვითარებულ მოვლენებს და აპროტესტებს წინა მოწვევის საკრებულოების მიერ მომავალი წლის ბიუჯეტის დამტკიცების ფაქტს:

“ის ფაქტი, რომ თვითმმართველობის ერთეულების 2022 წლის ბიუჯეტს ამტკიცებენ წინამოწვევის საკრებულოები, ნათლად წარმოაჩენს ხელისუფლების დამოკიდებულებას ხალხის არჩევანის, დემოკრატიისა და თავისუფლების მიმართ.

ეს აღარ არის ბრძოლა ოპოზიციურ პარტიებთან, „ქართული ოცნება“ პირდაპირ ებრძვის ქართველ ხალხს, რადგან მათ მიერ არჩეულ საკრებულოს წევრებს არ აძლევენ შესაძლებლობას ჩაერთონ აღნიშნულ პროცესში, მათ უსწორდებიან ძალისმიერი მეთოდებითდა აკავებენ ადამიანებს, ეს ყველაფერი სცდება კანონიერ ჩარჩოებს და სამწუხაროა, რომ სამართალდამცავი ორგანოები გადაიქცნენ არა სახელმწიფოს, არამედ ერთი პარტიის მსახურებად.

მოვუწოდებთ ხელისუფლებას, შეწყვიტოს ძალადობა და დაუყოვნებლივ გაათავისუფლოს ამპროცესებისას ბათუმში და ზუგდიდში დაკავებული ყველა პირი, მათ შორის „სტრატეგია აღმაშენებლის“ წევრი ვახტანგ ხუნდაძე,” – აცხადებს გიორგი ვაშაძე.

ინფორმაციას პოლიტიკური პლატფორმა “გიორგი ვაშაძე – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს