საქართველოს პარლამენტის თავმჯდომარის მოადგილემ არჩილ თალაკვაძემ კომენტარი გააკეთა საქართველოს მე-3 პრეზიდენტის, მიხეილ სააკაშვილის შიმშილობის და სპეციალურ სამედიცინო დაწესებულებაში გადაყვანის მოთხოვნასთან დაკავშირებით. მმართველი გუნდის წევრის თქმით, სააკაშვილს უტარდება საერთაშორისო სტანდარტის შესაბამისი ჯანმრთელობის მონიტორინგი და სამოქალაქო კლინიკაში გადაყვანის აუცილებლობას ვერ ხედავს:
,,მიხეილ სააკაშვილი დღეს, როგორც მოშიმშილე პატიმარი, განთავსებულია მულტიპროფილურ სამედიცინო ცენტრში, პენიტენციურ სისტემაში. მას, როგორც ყველა მოშიმშილე პატიმარს, უტარდება საერთაშორისო სტანდარტის შესაბამისად ჯანმრთელობის მდგომარეობის მონიტორინგი.
რა მაღალტექნოლოგიური სამედიცინო ჩარევა სჭირდება მიხეილ სააკაშვილს ისეთი, რომ ასე კატეგორიულად ადვოკატები, მისი პოლიტიკური თანამებრძოლები, ექიმების და პენიტენციური სისტემის ნაცვლად, ვინც პასუხისმგებელია მის სამედიცინო მომსახურებაზე – ითხოვენ სააკაშვილის გადაყვანას მაღალტექნოლოგიურ კლინიკაში?“, – განაცხადა არჩილ თალაკვაძემ.
ავტორი
ნინი ხიჯაკაძე
