თვითმმართველობის არჩევნების მეორე ტური 30 ოქტომბერს გაიმართება. ქუთაისის მერობის კანდიდატმა ,,ერთიანი ნაციონალური მოძრაობიდან“, ხატია დეკანოიძემ მოსახლეობას მოუწოდა აქტიურად ჩართვისა და საკუთარი ნების დაფიქსირებისკენ, რადგანაც მიაჩნია, რომ მმართველი პარტიისთვისთვის ძალაუფლების წართმევა იქნება უმნიშვნელოვანესი ფაქტორი დემოკრატიული და თავისუფალი ქვეყნის მშენებლობის გზაზე:
,,ხვალ არის დღე, როდესაც ოპოზიცია დიდ ქალაქებში, ასევე, სხვადასხვა მუნიციპალიტეტებში ემზადება გამარჯვებისთვის! ჩვენც ქუთაისში, რა თქმა უნდა, დარწმუნებულები ვართ იმაში, რომ აუცილებლად გავიმარჯვებთ!
მინდა, მოვუწოდო ყველა ადამიანს, რომელიც ფიქრობს, რომ ამ ქვეყანაში დღეს აუცილებელია ცვლილებები, რომ ხვალიდან ჩვენ უნდა გავიღვიძოთ სრულიად ახალ ქვეყანაში, სადაც დემოკრატია, თავისუფლება, კოალიციური მმართველობა, ქალაქების თვითმმართველობა და ზოგადად ამ ხელისუფლებისთვის ძალაუფლების წართმევა იქნება უმნიშვნელოვანესი ფაქტორი, რომელიც დაიწყება ზუსტად ჩვენი მოქალაქეების ნების დაფიქსირებით.
ძვირფასო მეგობრებო, მობრძანდით ყველა არჩევნებზე ხვალ, დააფიქსიროთ თქვენი ნება, რასაც ვერ აღუდგება ის გაყალბების მანქანა, რომელიც დღეს ამუშავებული აქვს ხელისუფლებას!“, – განაცხადა ხატია დეკანოიძემ.
ავტორი
ნინი ხიჯაკაძე
