“ფრიდრიხ ნაუმანის ფონდი თავისუფლებისთვის” სამხრეთ კავკასიაში და “საერთაშორისო ლიბერალ-დემოკრატთა კლუბი” მაისის თვეში მასპინძლობდნენ ერთობლივ, მრავალპარტიულ პროექტს “პარტნიორობა დემოკრატიისთვის”. “პოლიტიკური პლატფორმა-ახალი საქართველოს” პოლიტიკური საბჭოს წევრის, ნანა ტოხვაძის ინიცირებული, მრავალფეროვანი ფორმატის პროექტი თანხვედრაში მოვიდა ნაუმანის ფონდის თავისუფლების დაცვის იდეასთან და შესაძლებელი გახდა მისი განხორციელება ფონდის ნეიტრალურ სივრცეში.
პროექტის ინიციატორის, ნანა ტოხვაძის განცხადებით – “პროექტს განსაკუთრებულობა შესძინა მსჯელობისა და ჯანსაღი დისკუსიის შესაძლებლობამ ეროვნული და სახელმწიფოებრივი მნიშვნელობის საკითხებზე. იმ საკითხებზე, რომლებსაც პარტიული კუთვნილება არ შეიძლება გააჩნდეს. ასევე, მონაწილეთათვის საინტერესო აღმოჩნდა პროექტის ფორმატი – ჩართული მხარეების მრავალფეროვნების, მაღალკვალიფიციური სპიკერებისა და მომავლის პოლიტიკოსების თანაბარი ჩართულობის კუთხით”.
უნდა აღინიშნოს, რომ პროექტის ფარგლებში პროდასავლური, ლიბერალური ღირებულებების მქონე პარტიებისა და სამოქალაქო მოძრაობების წარმომადგენელთათვის შეთავაზებული იყო ღია, სადისკუსიო პლატფორმა, რაც მიზნად ისახავდა მრავალპარტიული დიალოგის გზით დემოკრატიის გაძლიერებას საქართველოში და ამ ფორმატის გამოყენებით, ჩართული მხარეების სამომავლო თანამშლომლობის ხელშეწყობას. მნიშვნელოვანია, რომ პროექტში მონაწილეობდნენ როგორც საპარლამენტო, ასევე საქართველოში მოქმედი არასაპარლამენტო პოლიტიკური ძალები: გაერთიანებული ოპოზიცია – “ძალა ერთობაშიას” წარმომადგენლები და ასევე, 6 პოლიტიკური ორგანიზაციისა თუ სამოქალაქო მოძრაობის წევრები.
თითოეულ შეხვედრაზე, პროექტში მონაწილეობის მისაღებად მოწვეულნი იყვნენ სხვადასხვა სფეროს ექსპერტები, არასამთავრობო ორგანიზაციების წარმომადგენლები, საზოგადოებრივი მოძრაობების აქტივისტები და სტუდენტები. “პარტნიორობა დემოკრატიისთვის” ითვალისწინებდა ოთხ შეხვედრას და ღია დისკუსიის ფორმატში კონსენსუსის ისეთ მნიშვნელოვან საკითხებზე, როგორებიცაა: სასამართლო სისტემა, ადამიანის უფლებები, განათლების სისტემა და სოციალური პოლიტიკა საქართველოში.
მნიშვნელოვანია, ხაზგასმით აღინიშნოს ფონდის მხარდაჭერა პროექტისადმი, რომელმაც ერთი მხრივ საშუალება მისცა პოლიტიკური პარტიების ახალ სახეებსა და ახალგაზრდა პოლიტიკოსებს, გამოევლინათ საკუთარი პოტენციალი, ხოლო მეორე მხრივ, ბიძგი მისცა მათ აქტიურ ჩართულობას ქვეყნის პოლიტიკურ ცხოვრებაში.
