“ჩვენ ვგეგმავთ, რომ კიდევ უფრო მეტად გავამკაცროდ რეგულაციები” – ირაკლი ღარიბაშვილი

საქართველოს პრემიერ-მინისტრმა ირაკლი ღარიბაშვილმა ჟურნალისტებთან კომენტარი გააკეთა ბათუმში მომხდარ ტრაგედიასთან დაკავშირებით, კიდევ ერთხელ მიუსამძიმრა დაღუპულთა ოჯახებს და განაცხადა, რომ მომხდარი ფაქტის გამო სამშენებლო-სარემონტო სფეროში რეგულაციების კიდევ უფრო გამკაცრდება:

,,მე მინდა კიდევ ერთხელ მივუსამძიმრო იმ ოჯახებს, რომლებმაც დაკარგეს ოჯახის წევრები და მართლა დიდი ტრაგედია არის ჩვენთვის, ყველასთვის.

აქვე მინდა ვთქვა, რომ აჭარის მთავრობამ ყველაფერი გააკეთა და ჩვენ, ცენტრალური ხელისუფლებაც მაქსიმალურად გვერდში დავუდგებით იმისთვის, რომ მაქსიმალურად დროულად ყველას გადაეცეს საცხოვრებელი ბინები საკუთრებაში. ამას გარდა, ფულადი კომპენსაციები იმისთვის, რომ შესაბამისი პირობები მოაწყონ საკუთარ სახლებში – ეს ერთი.

ამას გარდა, რა თქმა უნდა, ჩვენ ვგეგმავთ, რომ კიდევ უფრო მეტად გავამკაცროდ რეგულაციები. საერთოდ ნებართვის გაცემის პროცედურებიც უნდა გაკონტროლდეს მკაცრად და ასეთი შეცდომა მეორედ აღარ უნდა იქნას დაშვებული.

მოგეხსენებათ, რომ პოლიციამ უკვე დააკავა 3 პირი, რომელიც იკვეთება ამ დანაშაულში, ამ უბედურ შემთხვევაში, ტრაგედიაში. დავარქვათ ამას გულგრილობა თუ გაუფრთხილებლობა. ამას ბუნებრივია გამოძიება გასცემს პასუხს, მაგრამ მე მინდა ვთქვა, რომ ჩვენ მთავრობა ყველაფერს გავიღებთ იმისთვის, რომ ამ ოჯახებს მაქსიმალურად გვერდში დავუდგეთ“, – განაცხადა ირაკლი ღარიბაშვილმა.

ავტორი
ნინი ხიჯაკაძე