თბილისის საქალაქო სასამართლო ოფიციალურ გვერდზე განცხადებას აქვეყნებს მედიაში გავრცელებულ ინფორმაციასთან დაკავშირებით, სადაც საუბარია ტელეკომპანია ,,ფორმულა’’-სთვის სასამართლოს მიერ ყადაღის დადებაზე:
“მედია საშუალებებში ვრცელდება სრული დეზინფორმაცია, თითქოსდა ტელეკომპანია ,,ფორმულას’’ სასამართლოს მიერ ყადაღა დაედო, რაც არ შეესაბამება სიმართლეს.
საქართველოს თავდაცვის სამინისტრომ სარჩელით მომართა თბილისის საქალაქო სასამართლოს მოპასუხე დავით კეზერაშვილისა და ალექსანდრე ნინუას წინააღმდეგ. სასარჩელო მოთხოვნას წარმოადგენს მოპასუხეებისგან სოლიდარულად დანაშაულით მიყენებული ზიანის ანაზღაურება.
სარჩელის ფარგლებში უზრუნველყოფის ღონისძიების გამოყენების შესახებ მოთხოვნა სასამართლოში წარმოდგენილი არ ყოფილა, შესაბამისად აღნიშნულზე სასამართლო ვერც იმსჯელებდა,” – ნათქვამია გავრცელებულ განცხადებაში.
