კომპანია Netflix-ს, მინი-სერიალ “ლაზიერის გამბიტის” (The Queen’s Gambit) ერთ-ერთ ეპიზოდში დაფიქსირებული არასწორი ინფორმაციის გამო, ქალებს შორის ჭადრაკში მსოფლიოს ხუთგზის ჩემპიონი, ნონა გაფრინდაშვილი უჩივის:
“ბრალდება, რომ ნონა გაფრინდაშვილს არასდროს უთამაშია კაცთან, არის სიცრუე, ასევე უკიდურესად სექსისტური და დამამცირებელი 1968 წლისთვის, ანუ იმ დროისთვის, როცა ეპიზოდში ხდება მოქმედება, მას, სულ მცირე, 59 მოჭადრაკე კაცთან ჰქონდა მატჩი ჩატარებული, მათ შორის ჭადრაკის სულ მცირე ათ დიდოსტატთან…
ასევე Netflix-მა გაფრინდაშვილს უწოდა რუსი, მიუხედავად იმისა, რომ მათ იცოდნენ, რომ ის ქართველია და რომ საქართველო რუსეთის ზეწოლის და შეტევების მსხვერპლია“, – წერია საჩივარში
ნონა გაფრინდაშვილს მიაჩნია, რომ დეზინფორმაცია გაჟღერდა სერიალის კონკრეტულ ეპიზოდში, კერძოდ, მატჩის მსვლელობისას, რომელსაც გაფრინდაშვილის პერსონაჟიც ესწრება, ფილმის გმირის, მოჭადრაკე ბეტ ჰარმონის შესახებ კომენტატორო შემდეგ ფრაზას ამბობს: „ერთადერთი უჩვეულო რამ, მის შესახებ – მისი სქესია. თუმცა ესეც არ არის გასაკვირი რუსეთში. აქ ნონა გაფრინდაშვილია, მაგრამ ის ქალი მსოფლიო ჩემპიონია და არასდროს უთამაშია კაცის წინააღმდეგ“.
კომპენსაციის სახით მსოფლიოს ხუთგზის ჩემპიონი 5 მილიონ აშშ დოლარს ითხოვს. მოჭადრაკის ინტერესებს, ამერიკელ კოლეგებთან ერთად, ქართული იურიდიული ფირმა “BLB” დაიცავს.
საჩივარში აღნიშნულია, რომ სიცრუეა, თითქოს მას არასდროს უთამაშია მამაკაცის წინააღმდეგ. უფრო მეტიც, ფილმის აღნიშნული ეპიზოდის პერიოდისთვის, ანუ 1968 წლისთვის, ნონა გაფრინდაშვილს ჭადრაკი უკვე ჰქონდა ნათამაშევი არანაკლებ 59 მამაკაც მოჭადრაკესთან, რომელთაგან 10 უკვე იყო ჭადრაკის დიდოსტატი. გაფრინდაშვილისთვის ასევე მიუღებელია ის ფაქტი, რომ სერიალში მის პერსონაჟს რუს მოჭადრაკედ მოიხსენიებენ.
სარჩელი 2021 წლის 16 სექტემბერს წარედგინა კალიფორნიაში სასამართლოს.
