საქართველოს მე-3 პრეზიდენტმა, მიხეილ სააკაშვილმა მორიგი ვიდეომიმართვა გაავრცელა საქართელოს საზოგადოებისადმი და კიდევ ერთხელ დადო პირობა, რომ 2 ოქტომბრის არჩევნების წინ იგი აუცილებლად ჩამოვა საქართველოში:
“ბევრი მეკითხება, თუ როგორია ჩემი გეგმები იმ ისტორიულ არჩევნებთან/რეფერენდუმთან დაკავშირებით, რომელიც 2 ოქტომბერს იმართება საქართველოში.
მიუხედავად იმისა, რომ ივანიშვილმა ევროკავშირის ხელშეკრულებიდან გამოსვლა გამოაცხადა, ქართველი ხალხი და ევროპა არ გამოსულა ამ ხელშეკრულებიდან. 2 ოქტომბერს, დიახაც რომ იმართება რეფერენდუმი ივანიშვილისთვის უნდობლობის გამოცხადების თაობაზე.
ამგვარად იმისათვის, რომ ეს წარმოუდგენელი სპირალი სიღარიბის, გაღატაკების, გაუბედურების, ოჯახების დანგრევის, საქართველოს განადგურების – დასრულდეს, თითოეულმა საქართველოში მყოფმა ადამიანმა უნდა მიიღოს თავისთვის გადაწყვეტილება, უნდა წავიდეს ამ რეფერენდუმზე და ხმა მისცეს ივანიშვილის ე.წ. “ოცნების” წინააღმდეგ. ეს არის ჩვენი პატრიოტული ვალი საქართველოს გადასარჩენად.
ყველაფერი ნადგურდება საქართველოში, მასობრივად გაედინება ხალხი, ყოველდღიურად სისხლისგან და ხალხისგან იცლება ქვეყანა, ნადგურდება ჩვენი ისტორიული ფასეულობები, ჩვენი საეკლესიო ცხოვრების წესი, ჩვენი ბავშვების მომავალი. ამას ჩვენ ვერ შევეგუებით, ეს არის ბოლო ზღვარი და აუცილებლად ყველამ უნდა ამოვიღოთ ხმა, ყველა უნდა ჩავერთოთ პროცესში.
ჩვენ ყველა ერთად არ მივცემთ ივანიშვილს საშუალებას, გაგვიმეოროს ერთი და იგივე „ტრიუკი“ თავისი, ვითომ საარჩევნო კამპანიით და მერე გაყალბებებით, გადაწერებით, საქართველოდან გასული ხალხის პირადობის მოწმობების გამოყენებით. ის ამ ყველაფერს იზამს, რა თქმა უნდა, იზამს, ოღონდ ამჯერად, ყველაფერ ამას, ჩვენ უნდა გავცეთ პასუხი. ჩვენ უნდა ვისწავლოთ პასუხის გაცემა, ჩვენ უნდა შევუბრუნოთ მათ ხელი, თუ ისინი გადავიდნენ ძალადობაზე. ჩვენ არ გვინდა არეულობა და არ გვინდა ძალადობა, მაგრამ გვინდა მომავალი. არ გვინდა, რომ ჩვენზე ძალადობდეს ვინმე, არ გვინდა, რომ გვანადგურებდეს ვინმე და ჩვენ ამას წყნარად შევხვდეთ. იმიტომ, რომ ჩვენ ვართ ქართველები და ჩვენ გვაქვს ღირსება და სიამაყე და ჩვენ გვინდა ადამიანური ცხოვრება.
მე მინდა ვთქვა, რომ პირადად მე ჩავალ ამ არჩევნებზე, საქართველოში და ასევე მინდა მოივუწოდო უცხოეთში მყოფ ყველა ჩვენ თანამემამულეს, ვისაც გაქვთ ამის საშუალება, არჩევნების დღეებში აიღეთ შვებულება, ამისთვის გამოყავით თქვენი დრო, საშუალებები და ვისაც როგორ შეგიძლიათ – ხმელთით, ჰაერით, ყველა ერთად, წავიდეთ საქართველოში“, – აცხადებს მიხეილ სააკაშვილი.
