“რიგითი საჯარო მოხელეების ფეისბუქპოსტებს და ფეისბუქზე ლაიქებს დასდევს ხელისუფლება და ამაში იხარჯება სახელმწიფოს მთელი რესურსი” – ნათია მეზვრიშვილი

„პარტია „საქართველოსთვის“ გაძლიერების და ჩვენი მხარდამჭერების რაოდენობის ზრდის პარალელურად იზრდება პოლიტიკური ნიშნით ზეწოლა ჩვენს მხარდამჭერებზე“, – ამის შესახებ პარტია „საქართველოსთვის“ თავმჯდომარის მოადგილემ – ნათია მეზვრიშვილმა განაცხადა.

მეზვრიშვილი ხაზს უსვამს, რომ საჯარო მოხელეებზე ზეწოლა ხელისუფლებამ ჯერ კიდევ პარტიის ოფიციალურად დაარსებამდე დაიწყო, თუმცა თუ იმ ეტაპზე ძირითადად სამსახურიდან გაშვებით შემოიფარგლებოდნენ – უკვე იყენებენ დაშინების, ზეწოლის, ახლობლების დაშინების და კერძო ბიზნესზე ზეწოლის მეთოდებსაც.

„ბოლო რამდენიმე თვეა, ხელისუფლებამ გაამრავალფეროვნა ზეწოლის, მუქარის და პოლიტიკური ნიშნით დევნის მეთოდები – საწყის ეტაპზე მხოლოდ თანამდებობებიდან გათავისუფლებას იყენებდა ზეწოლის ინსტრუმენტად, დღეს უკვე, ისევე როგორც ეს ხდებოდა 2011-2012 წლებში – ოპონენტების მიმართ ხელისუფლება აქტიურად იყენებს ბიზნესზე ზეწოლის ოჯახის წევრების დაშინების, ნათესავების, ახლობლების დაშინების მეთოდებს,“- განაცხადა მეზვრიშვილმა.

„საწყისი ეტაპიდან განსხვავებით ნიშანდობლივია, რომ დღეს უკვე ხელისუფლებამ ჩართო მთელი სახელმწიფო მანქანა, ჩვენი მხარდამჭერების და წევრების მიმართ პოლიტიკური ნიშნით დევნის მიზნებისთვის ხელისუფლება აქტიურად იყენებს სახელმწიფო უსაფრთხოების სამსახურს, ძალოვან უწყებებს, პოლიციას, შემოსავლების სამსახურს,“ – ამტკიცებს ნათია მეზვრიშვილი, თუმცა ხაზი გაუსვა რომ ამ უწყებების რიგითი თანამშრომლების მდგომარეობა გასაგებია და მიმდინარე მოვლენებზე სრული პასუხისმგებლობა მხოლოდ პოლიტიკურ ხელმძღვანელობას ეკისრება.

„დღეის მდგომარეობით ათეულობით საჯარო მოხელეა გათავისუფლებული დაკავებული პოზიციებიდან, როგორც შუა რგოლის მენეჯერები, ასევე რიგითი თანამშრომლები. განსაკუთრებით შემაშფოთებელია, რომ ახალ ტენდენციას წარმოადგენს პოლიციელების და ძალოვანი უწყებების თანამშრომლების დევნა პოლიტიკური ნიშნით. გუშინდელი შემთხვევა არ იყო პირველი შემთხვევა – ბოლო თვეების განმავლობაში ათეულობით პოლიციელი იქნა გათავისუფლებული დაკავებული თანამდებობიდან პოლიტიკური ნიშნით,“ – განაცხადა პარტია „საქართველოსთვის“ თავმჯდომარის მოადგილემ.

„განსაკუთრებით მძიმეა რომ რიგითი საჯარო მოხელეების ფეისბუქპოსტებს და ფეისბუქზე ლაიქებს დასდევს ხელისუფლება და ამაში იხარჯება სახელმწიფოს მთელი რესურსი,“ – აღნიშნავს ნათია მეზვრიშვილი.