პარტია „საქართველოსთვის“ თავმჯდომარე გიორგი გახარია ქვეყანაში მიმდინარე პროცესების შეფასებისას აცხადებს, რომ ლანძღვა-გინებაში, ცემა-ტყეპასა თუ დაპირისპირებებაში ხალხი ყველას დაავიწყდა:
„ეს ქაოსი დასამთავრებელია და სახელმწიფო სახელმწიფოს თუ არ დაემსგავსა და წესრიგი თუ არ დამყარდა, სულ ესე ვიქნებით ჩვენ. ლანძღვაში, გინებაში, ცემა-ტყეპაში და ასე გაურკვევლად. გლეხი იქნება უპატრონოდ – მოქალაქეები არავის აღარ არ აინტერესებს. ერთი ფიქრობს ძალაუფლება როგორ შეინარჩუნოს და მეორე ცდილობს ეს ძალაუფლება ხელში როგორ ჩაიგდოს. ხალხი საერთოდ არავის არ ახსოვს. ხალხი რო ახლა დაავიწყდა ყველას – ეს პრობლემაა“, – აღნიშნავს გიორგი გახარია.
გიორგი გახარიამ ასევე აღნიშნა, რომ ნაციონალური მოძრაობა და ქართული ოცნება ერთმანეთს ემსგავსებიან.
„ყველაზე ცუდი ის არის, რომ ძალიან ემსგავსებიან ერთმანეთს – რაც დრო გადის, უფრო ერთნაირები ხდებიან და ახლა ეს ყველაფერი უნდა დასრულდეს. არავინ არ ამბობს რო იქ ყველაფერი ცუდი იყო – მეც იქ ვიყავი და იქ ბევრი რამე კარგიც იყო და ბევრი ღირსეული ადამიანიც არის დარჩენილი. უნდა გამოვასწოროთ ეს ყველაფერი – წყნარად, მშვიდად, ყველანაირი გადატრიალებების და რევოლუციების გარეშე – არჩევნების გზით, ისე როგორც ჩვენ და ჩვენს წარსულს და ისტორიას შეეფერება, ლანძღვა-გინების გარეშე, ღირსებით, ნელა უნდა მივყვეთ და ეს ბრძოლა გამარჯვებით უნდა დავასრულოთ, ყველამ ერთად,“ – აცხადებს გიორგი გახარია.
ინფორმაციას პარტია “საქართველოსთვის” პრესსამსახური ავრცელებს
