“ქართულმა ოცნებამ” და “ნაციონალურმა მოძრაობამ” თავისი რადიკალიზმით საზოგადოებას წაართვეს კითხვებზე პასუხის მიღების შესაძლებლობა – ჩვენთვის ეს მიუღებელია” – ნათია მეზვრიშვილი პარლამენტში შს მინისტრის მოსმენის ჩაშლაზე

პარტია „საქართველოსთვის“ პოლიტსაბჭოს წევრმა ნათია მეზვრიშვილმა „პალიტრა ნიუსის“ ეთერში მოახლოებულ არჩევნებსა და ქვეყანაში მიმდინარე პოლიტიკურ მოვლენებზე ისაუბრა.

მეზვრიშვილმა აქცენტი გააკეთა 18 ივლისს შინაგან საქმეთა მინისტრის საპარლამენტო მოსმენის ჩაშლაზე და აღნიშნა, რომ „ნაციონალურმა მოძრაობამ და „ქართულმა ოცნებამ“ ერთობლივად წაართვეს მოსახლეობას ქვეყანაში მომხდარ ძალადობაზე არსებულ კითხვებზე პასუხების მიღების შესაძლებლობა.

„გადავხედოთ რა მოხდა პარლამენტში 18 ივლისს. ფაქტია უკვე – შემდგარი ფაქტია, რომ ქართულმა ოცნებამ და ნაციონალურმა მოძრაობამ თავისი რადიკალიზმით საზოგადოებას წაართვეს კითხვებზე პასუხის მიღების შესაძლებლობა. ჩვენთვის ეს მიუღებელია. ამ მხრივ ჩვენ თამამად შეგვიძლია დავსვათ ტოლობის ნიშანი,“ – განაცხადა ნათია მეზვრიშვილმა.

ნათია მეზვრიშვილმა ხაზი გაუსვა, რომ პარტია „საქართველოსთვის“ სხვა ოპოზიციური პარტიებისგან განსხვავებით, არ ემხრობა მთავრობისათვის უნდობლობის გამოცხადებას, არამედ ხელისუფლების მხრიდან მომხდარზე პოლიტიკური პასუხისმგებლობის აღებასა და საზოგადოების კითხვებზე პასუხების გაცემას მიიჩნევს აუცილებლად.

„ჩვენ ვითხოვდით მომხდარ მოვლენებზე პოლიტიკური პასუხისმგებლობის აღებას ქართული ოცნების მხრიდან.

ჩვენ არ ვთვლით, რომ უნდობლობის გამოცხადება ამ ეტაპზე რაიმე შედეგს გამოიღებს. ვთვლიდით და დღესაც ვითხოვთ ამას, რომ უფრო გონივრული იქნებოდა ეს ადამიანები, რომლებიც ძალადობას ახალისებდნენ, არაფერი გააკეთეს ძალადობის აღსაკვეთად და რეალურად დაუცველობის განცდა გააჩინეს ქვეყანაში – პარლამენტში უნდა მიბრძანებულიყვნენ: ძალოვანი უწყებების წარმომადგენლები, პრემიერ-მინისტრი – და იქ უნდა გაეცათ საზოგადოებისთვის საინტერესო კითხვებზე პასუხი.

ამის ნაცვლად „ნაციონალურმა მოძრაობამ“ „ქართულ ოცნებას“, რომელსაც კითხვებზე პასუხის გაცემა არ უნდოდა, ამაში ყველაფერში ხელი შეუწყო. ამ ოპოზიციურმა ძალამ რეალურად თავიდან აარიდა ეს პასუხისმგებლობა ხელისუფლებას.

ამის მიუხედავად ჩვენ მაინც ვითხოვთ, რომ რამდენადაც საპარლამენტო რესპუბლიკაში ვცხოვრობთ – „ქართულ ოცნების“, ხელისუფლების პოლიტიკური პასუხისმგებლობა პირველ რიგში ნიშნავს იმას, რომ ისინი უნდა მიბრძანდნენ და პარლამენტის წინაშე საზოგადოებისთვის საინტერესო კითხვებს უნდა გასცენ პასუხი,“ – აღნიშნა ნათია მეზვრიშვილმა.

ინფორმაციას პარტია “საქართველოსთვის” პრესსამსახური ავრცელებს