“დღეს რეგისტრაციის ტემპი არ არის ისეთი მაღალი, როგორის მოლოდინიც გვქონდა” – თამარ გაბუნია

დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ თამარ გაბუნიამ კომენტარი გააკეთა ვაქცინაციის პროცესის მიმდინარეობასთან დაკავშირებით და აღნიშნა, რომ რეგისტრაციის შესაძლებლობები მალე გაიხსნება სხვა ვაქცინებისთვის, რომლებიც ჯერ არ შემოსული და შესაძლებელია მათზე უფრო აქტიური მოთხოვნა აღმოჩნდეს მოსახლეობის მხრიდან:

,,დღეს რეგისტრაციის ტემპი არ არის ისეთი მაღალი, როგორც ჩვენ ვისურვებდით და როგორის მოლოდინიც გვქონდა. აქ, რა თქმა უნდა, გამოსავალი არის ისევ და ისევ აქტიური საინფორმაციო-საკომუნიკაციო კამპანია, რაც მიმდინარეობს და კიდევ უფრო აქტიურ ხასიათს მიიღებს.

ასევე, ეს არის ნებისმიერი ბიუროკრატიული და ადმინისტრაციული ბარიერის მოხსნა და გეოგრაფიული ხელმისაწვდომობის გაუმჯობესება ვაქცინაციის პროცესზე.

რეგისტრაციის შესაძლებლობები, ასევე, მალე გაიხსნება სხვა ვაქცინებისთვისაც და ჩვენ იმის მოლოდინიც გვაქვს, რომ გარკვეული უპირატესობა შესაძლოა მოსახლეობამ მიანიჭოს იმ ვაქცინებს, რომლებსაც ველოდებით და ჯერჯერობი ესენი რეგისტრაციაში არ არის“, – განაცხადა თამარ გაბუნიამ.

ავტორი
ნინი ხიჯაკაძე