“დღეს, ქართველ ხალხს შია, იხრჩობა ვალებში, არის უმუშევარი და გარბის ქვეყნიდან!” – გიორგი ვაშაძე

,,სტრატეგია აღმაშენებლის“ ლიდერმა, პარლამენტის რიგგარეშე სესიაზე, პრემიერ-მინისტრ ირაკლი ღარიბაშვილს მიმართა და ქვეყანაში არსებული მძიმე ეკონომიკური მდგომარეობის კონკრეტული შეფასებები წარუდგინა:

,,მე ვსვამ მართლაც ძალიან მნიშვნელოვან კითხვას: ბატონო ირაკლი მე მახსოვს, თქვენ რომ პირველად წარგადგინეს პრემიერ-მინისტრად, მთავარი საკითხი, რაზეც თქვენ საუბრობდით იყო სამართლიანობის აღდგენა.

დღეს, როცა თქვენ მეორედ ხართ პრემიერ-მინისტრი, სხვათა შორის, ბევრი ვალი თქვენი წინამორბედების აღებულია, კვლავ დავსვათ კითხვა: ვისთვის აღდგა სამართლიანობა საქართველოში? აღდგა სამართლიანობა პენსიონრისთვის? აღდგა სამართლიანობა ახალგაზრდა ადამიანისთის, რომელიც ქვეყნიდან გარბის სამუშაო ადგილის საძიებლად? აღდგა სამართლიანობა მრავალშვილიანი ოჯახებისთვის? აღდგა სამართლიანობა ვეტერანებისთვის? პოლიციელებისთვის? თუნდაც, საჯარო მოხელეებისთვის – რომელთაც ხელფასი არ გაზრდია წლებია.

ვისთვის აღდგა სამართლიანობა? – ,,ქართული ოცნების“ ელიტისთვის, რომელიც ძალიან კარგად გრძნობს თავს ქვეყანაში. დიახ! თქვენ და თქვენთან დაკავშირებული ადამიანები ფულსაც აკეთებენ, შემოსავალიც ბევრი აქვთ, კარგადაც ცხოვრობენ – ამიტომაც არის, რომ თქვენი პრეზენტაციის დროს ძალიან კარგ ხასიათზე იყავით, ეს ბედნიერებაც გეტყობოდათ, მაგრამ ჩვენი, ოპოზიციის მოვალეობაა შეგახსენოთ, ბატონო ირაკლი, რომ დღეს საქართველო არის მსოფლიოში ერთ-ერთი ყველაზე უბედური ქვეყანა.

დღეს, ქართველ ხალხს შია, იხრჩობა ვალებში, არის უმუშევარი და გარბის ქვეყნიდან!“, – განაცხადა გიორგი ვაშაძემ.

ავტორი
ნინი ხიჯაკაძე