“ირაკლი ღარიბაშვილს და ელისო ბოლქვაძეს გვინდა ვაჩვენოთ, როგორ უჭირთ ადამიანებს, რომლებიც უფასო სასადილოში დადიან და სხვა გზა არ აქვთ ამის გარდა” – თეონა ჭალიძე

პარლამენტში მთავრობის მეთაურის, ირაკლი ღარიბაშვილის სნგარიშით გამოსვლას პერფომანსის ხვდება “სტრატეგია აღმაშენებლის” პოლიტსაბჭოს წევრი, სოციალური მიმართულების ხელმძღვანელი, თეონა ჭალიძე და ხელისუფლების ყურადღების მიპყრობას ცდილობს უფასო სასადილოებისა და ხალხის გაჭირვების თემაზე:

„აქ წარმოდგენილია ის მწარე რეალობა, რაც ჩვენს ქვეყანაში ათასობით ადამიანს აწუხებს. ჩვენ ვეპატიჟებით ირაკლი ღარიბაშვილს და ელისო ბოლქვაძეს უფასო სასადილოდან წამოღებული ულუფების სუფრაზე, რომელიც ლარი და 30 თეთრით მზადდება. გვინდა, მათ გასინჯონ და გვითხრან, საკმარისია თუ არა მთელი დღის განმავლობაში ერთი ადამიანისთვის ლარი და 30 თეთრი გამოსაკვებად. გვინდა, ვაჩვენოთ, როგორ უჭირთ ადამიანებს, რომლებიც უფასო სასადილოში დადიან და სხვა გზა არ აქვთ ამის გარდა. გვინდა პრემიერს ვაჩვენოთ, რომ ამ საკვებზეც კი ჩვენს ქვეყანაში ბევრ ადამიანს ხელი არ მოუწვდება.

უფასო სასადილოების საქმე, ზოგადად, ბუნდოვანი და კორუფციულია. ჩვენ ოთხი წლის წინ კვლევის საფუძველზე მივმართეთ პროკურატურას, აღიძრა კიდეც სისხლის სამართლის საქმე, რადგან ტენდერში გამარჯვებული კომპანიები მილიონობით ლარს იდებდნენ ჯიბეში და საკმარის ულუფებს არ ამზადებდნენ. შესაბამისად, ამ გამოძიებაზე 4 წელია პასუხს ველოდებით, მაგრამ პროკურატურიდან გუშინ მომივიდა წერილი, სადაც გვეუბნებიან, რომ მიმდინარეობს გამოძიება და ჯერ შემაჯამებელი პასუხი არ აქვთ.

4 წელი არ უნდა დასჭირვებოდა ამ კორუფციული საქმის გახსნას, რომ არა დაინტერესებული პირები და მათი უშუალო ჩარევა ამ საქმეში”,- განაცხადა თეონა ჭალიძემ.

ინფორმაციას “სტრატეგია აღმაშენებლის” საზოგადოებასთან ურთიერთობის სამსახური ავრცელებს