“ლიბერთი ბანკის მეპატრონე არ არის ბანკირი, ის არის ჩვეულებრივი მძარცველი” – გიორგი ვაშაძე

„სტრატეგია აღმაშენებლის“ ლიდერმა გიორგი ვაშაძემ, საფინანსო-საბიუჯეტო კომიტეტის სხდომაზე, პენსიონრების სესხის პროცენტზე და ლიბერთი ბანკის მონოპოლიზირებულ პრივილეგიებზე ისაუბრა. როგორც ვაშაძე აცხადებს, ხელისუფლება აღნიშნულ ბანკს პენსიონრების ძარცვის უფლებას აძლევს. ოპოზიციონერმა ლიდერმა სიტყვით გამოსვლისას ლიბერთი ბანკის მეპატრონე მოსახლეობის ძარცვაში პირდაპირ დაადანაშაულა

„ლიბერთი ბანკის მეპატრონე არ არის ბანკირი, ის არის ჩვეულებრივი მძარცველი, რომელსაც სახელმწიფომ პენსიონრების ძარცვის ექსკლუზიური უფლება მისცა. ჩვენი დათვლებით ამ ადამიანს, ე.წ. ბანკირ რუხაძეს, წელიწადში მიაქვს დაახლოებით 100 მლნ ლარი პენსიონრების ჯიბიდან. შესაბამისად დღეს ჩვენი კანონპროექტი შეეხება სწორედ ამ ძარცვის დასრულებას ქვეყანაში, ამას არ სჭირდება სამუშაო ჯგუფების შექმნა, ამას არ სჭირდება ბევრი ბელეტრისტიკა, ამას სჭირდება ერთი პატარა ცვლილება კანონში, რომლითაც პენსიონერს ექნება საბანკო მომსახურების არჩევის თავისუფლება.

ჩვენ არ ვითხოვთ არანაირი რეგულაციების შემოღებას, არ ვითხოვთ იძულებით რაიმე სესხის პროცენტის დაწევას, ჩვენ ვამბობთ, რომ თუ პენსიონერს ექნება ბანკის არჩევის თავისუფლება მინიმუმ ჩვენი დათვლებით 20%-მდე შეიძლება ჩამოვიდეს სესხის პროცენტი.

პენსიონერს დღეს არ აქვს უფლება, რომ საკუთარი პენსიით ე.წ. „ოვერდრაფტი“ აიღოს სხვა ბანკში, იმიტომ, რომ ექსკლუზიური ძარცვის უფლება აქვს ლიბერთი ბანკს“, – აცხადებს გიორგი ვაშაძე.

ინფორმაციას ფრაქცია „სტრატეგია აღმაშენებლის“ საზოგადოებასთან ურთიერთობის სამსახური ავრცელებს

ცნობისათვის: ირაკლი რუხაძე სამეთვალყურეო საბჭოს თავმჯდომარის თანამდებობას 2017 წლიდან იკავებს