“ერთხელ და სამუდამოდ საჭიროა ამ ქვეყანას ანგარიშვალდებული და პასუხისმგებლიანი მთავრობა ჰყავდეს” – პაატა მანჯგალაძე

„სტრატეგია აღმაშენებლის“ გენერალურმა მდივანმა პაატა მანჯგალაძემ, საპარლამენტო ტრიბუნიდან „ქართული ოცნების“ დეპუტატებს მიმართა. როგორც მანჯგალაძემ აღნიშნა, საარჩევნო კოდექსში და სხვა არაერთ სფეროში საკანონმდებლო ცვლილებები საჭირო. პარლამენტის დეპუტატმა ასევე განაცხადა, რომ დღეს არსებული პარლამენტი არ ასახავს ხალხის მიერ გამოხატული ნების შესაბამის რეალობას:

„თურმე საარჩევნო კოდექსში ცვლილებები საჭირო ყოფილა და ეს გაითვალისწინა შარლ მიშელის დოკუმენტმა. სასამართლო რეფორმაზე შეთანხმებული ვართ, რომ სასამართლო არ არის ისეთი, როგორიც სჭირდება ქვეყანას, გენერალური პროკურორზეც შეთანხმებული ვართ, პროპორციულ სისტემაზეც შევთანხმდით, რომ მომდევნო არჩევნები უნდა ჩატარდეს პროპორციული სისტემით და უფრო მეტიც ახლა, რომ ყოფილიყო პროპორციული სისტემით არჩევნები თქვენ უმრავლესობა კი არ იქნებოდით გაყალბების მიუხედავად, თქვენ იქნებოდით უმცირესობა, რადგან თქვენს წინააღმდეგ უფრო მეტმა ხალხმა მისცა ხმა ვიდრე აიღეთ. ეს არის ყველაზე დიდი უსამართლობა, რომ პარტიამ, რომელმაც აიღო ცხრაასი ათასი ხმა ჰქვია უმრავლესობა და უმცირესობა ეწოდება იმ ჯგუფს, რომელმაც გაყალბების მიუხედავად მოიპოვა ერთ მილიონზე მეტი მოქალაქის ხმა. სწორედ ამიტომ ვართ პარლამენტში შემოსული, რომ ეს დანაშაული და უსამართლობა აღმოვფხვრათ. ერთხელ და სამუდამოდ საჭიროა ამ ქვეყანას ანგარიშვალდებული და პასუხისმგებლიანი მთავრობა ჰყავდეს“, – განაცხადა პაატა მანჯგალაძემ.

ინფორმაციას “სტრატეგია აღმაშენებლის” საზოგადოებასთან ურთიერთობის სამსახური ავრცელებს