დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ამირან გამყრელიძემ, დღეს გამართულ ბრიფინგზე, ქვეყანაში მასობრივი ვაქცინაციის დაწყების შესახებ ისაუბრა და ასევე აღნიშნა, რომ შეზღუდვების შემსუბუქებასთან დაკავშირებით მიმდინარეობს გარკვეული მსჯელობა:
“ივლისიდან სამიზნე მაჩვენებლებზე რომ გავიდეთ, დაახლოებით გვჭირდება 20-25 ათასი აცრა ყოველდღიურად. ძალიან მაღალი ალბათობით გვაქვს დადასტურება, რომ ივლის-ოქტომბერში ქვეყანა მიიღებს დაახლოებით 3 მილიონ 200 ათასზე მეტ დოზა ვაქცინას, ანუ ჩვენ შეგვეძლება ე.წ. მასობრივი ვაქცინაციის დაწყება. მე ხშირად გეუბნებოდით, რომ მასობრივ ვაქცინაციას დავიწყებთ მაშინ, როცა საწყობებში გარანტირებულად გვექნება ყველა თვის დასაწყისში გვექნება ვაქცინის სულ მცირე ნახევარი მილიონი დოზა.
იყო საუბრები და მომავალშიც იქნება, გარკვეულ შეღავათებზე როგორც “კომენდატის საათთან”, ასევე სამასპინძლო დაწესებულებებთან მიმართებაში. რაც შეეხება პირბადის ტარებას, სანამ კუმულაციური, კრიტიკული მასა ქვეყანაში არ აიცრება პირბადის ტარებაზე ჯერ უარს ვერ ვიტყვით.
ხოლო, თუ არ დავიცავთ რეგულაციებს, თუ არ ავიცრებით, ზაფხულის ბოლოს – შემოდგომის დასაწყისში შესაძლებელია მე-4 ტალღის დაწყება“, – აცხადებს ამირან გამყრელიძე.
ჟურნალისტებთან გუშინდელი შეხვედრისას ამირან გამყრელიძემ ასევე აღნიშნა, რომ უმჯობესდება ეპიდსიტუაცია, თუმცა ამან არ უნდა გაგვათამამოს და ისევ მკაცრად უნდა დავიცვათ რეგულაციები:
“უმჯობესდება ეპიდსიტუაცია, მაგრამ ამან არ უნდა გაგვათამამოს და არ უნდა მივეცეთ თვითკმაყოფილებას. ჩვენ ყველა, უნდა დავემორჩილოთ რეგულაციებს. კი, ძალიან კარგია, როდესაც გვინდა დიდი სადღესასწაულო თავყრილობები, მაგრამ კარგა ხანი ამაზე უარი უნდა ვთქვათ იმიტომ, რომ ყველა დიდი გავრცელება იწყება ამ დიდი თავყრილობებიდან.
უნდა დავიცვათ რეგულაციები! მესმის, რთულია, მაგრამ სხვა გამოსავალი არ არის. სამწუხაროდ, პატარა საქართველოსთვის ყოველდღიურად 15-17 თუ 20 გარდაცვლილი – ეს არის ძალიან დიდი გამოწვევა და ტრაგედია,” – განაცხადა დაავადებათა კონტროლის ეროვნული ცენტრის ხელმძღვანელმა.