“ამ ეტაპზე არავისთან, არც ერთ ფრაქციაში გაერთიანებას არ ვგეგმავ” – თამარ კორძაია

პარლამენტის დეპუტატი, ,,რეპუბლიკური“ პარტიის ყოფილი წევრი, თამარ კორძაია აცხადებს, რომ პარლამენტში შესვლა მოუწია, როგორც დამოუკიდებელ დეპუტატს. ოპოზიციონერი პოლიტიკოსი აღნიშნავს, რომ საკუთარ ხმას ხედავს ადამიანის უფლებათა დაცვის კუთხით, რადგან მიიჩნევს, რომ ეჭვქვეშ დგას საქართველოში ადამიანის თავისუფალი არჩევანი:

,,მე-10 მოწვევის პარლამენტში მომიწია დამოუკიდებელი დეპუტატის სტატუსით შემოსვლა. ამ ეტაპზე არავისთან, არც ერთ ფრაქციაში გაერთიანებას არ ვგეგმავ.

რაც შეეხება სამუშაო ხედვებს, მერვე მოწვევის პარლამენტში ვფიქრობ, რომ ჩემი ხმა ისმოდა ადამიანის უფლებების დაცვის კუთხით. ეს უფრო ძლიერი იქნება მეათე მოწვევის პარლამენტში. იმიტომ, რომ ვითარება კიდევ უფრო მძიმეა და დღეს საქართველოში ადამიანებს წაერთვათ უფლება დემოკრატიაზე. რაც იმას ნიშნავს, რომ არჩევანის უფლება დღეს ეჭვქვეშ დგას, ამ ქვეყანაში. სწორედ ამიტომ შეიქმნა კრიზისი.

მე ვარ ის ადამიანი, რომელიც თვლიდა და თვლის, რომ გაყალბდა არჩევნები. შემდგომ უკვე პოლიტიკური კრიზისის შედეგად შედგა შეთანხმება და ამ შემოდგომაზე ჩვენ უნდა დავამტკიცოთ, რომ მოქალაქეების უმრავლესობის ნება არ იყო ერთპარტიული მმართველობა ამ ქვეყანაში.

სწორედ არის ძირითადი მიზანი და ჩვენ ვეცდებით, რომ ეს დავანახოთ ამ ხელისუფლებას“, – განაცხადა თამარ კორძაიამ.

ავტორი
ნინი ხიჯაკაძე