,,ერთიან ნაციონალურ მოძრაობაში” დღეს გაიმართა 120 წევრიანი პოლიტიკური საბჭოს სხდომა, სადაც უნდა მიეღოთ საბოლოო გადაწყვეტილება პარლამენტში შესვლა/არ შესვლის საკითხზე. პოლიტსაბჭოს გადაწყვეტილება ანუ პარლამენტში შესვლის თაობაზე განცხადება ბრიფინგზე გააკეთა პარტიის თავმჯდომარემ, ნიკა მელიამ. მან, ასევე, ევროპული მედიაციით შემოთავაზებულ დოკუმენტთან დაკავშირებით გააკეთა განმარტება და განაცხადა, რომ პარტია დოკუმენტს ხელს ვერ მოაწერს, რადგანაც მასში შეტანილია პუნქტი, რომელიც კატეგორიულად მიუღებელია პარტიისთვის:
,,მივიღეთ გადაწყვეტილება, რომ ევროპული მედიაციით შემოთავაზებულ დოკუმენტს ხელს არ ვაწერთ. მაგრამ აქვე, რა თქმა უნდა, უდიდესი პატივისცემა მინდა დავუდასტურო ევროკავშირს, პერსონალურად პრეზიდენტ მიშელს, ბატონ დანიელსონს, ქალბატონ აშშ-ს ელჩს საქართველოში -კელი დეგნანს და განსაკუთრებით დიდი მადლობა ბატონ კარლ ჰალცერს, ევროკავშირის ელჩს საქართველოში.
ამ შეთანხმებაში არის ერთი პუნქტი, რომელიც ჩვენთვის კატეგორიულად მიუღებელია. ამ ყველაფრის გათვალისწინებით, მით უმეტეს პოსტ ფაქტუმ, ჩვენ ხელმოწერას ამ დოკუმენტზე ვერ დავსვამთ.
თუმცა, რა თქმა უნდა, სხვა საკითხებთან მიმართებაში ჩვენ თავიდან ბოლომდე ჩავერთვებით საკანონმდებლო საკითხების გადაწყვეტილებაში. ვიბრძოლებთ იმისათვის, სხვა ოპოზიციურ პარტიებთან ერთად, რომ ეს მავნებელობა, რომელსაც ახლა ადგილი აქვს ,,ქართული ოცნების” მხრიდან და უკვე დაარღვიეს არაერთი შეთანხმება – შევბოჭოთ და არ მივცეთ გასაქანი დამატებითი მავნებლობისაგან.
ეს არის ჩვენი გადაწყვეტილება, რომელიც საბოლოოა.
ხვალიდან ჩვენ ვიწყებთ უკვე გახუთმაგებული, გაექვსმაგებული თუ გაასმაგებული, როგორც გინდათ გენებოთ, ბრძოლას ქვეყნის გათავისუფლებას მტაცებლებისაგან“, – განაცხადა ნიკა მელიამ.
ავტორი
ნინი ხიჯაკაძე
