დღეს “ექსპო ჯორჯიაში” საქართველოს ყოფილმა პრემიერ-მინისტრმა, გიორგი გახარიამ პარტია “საქართველოსთვის” დააფუძნა. პარტიის ლოზუნგია “სიმართლე და მოქმედება”. მთავრობის ყოფილმა მეთაურმა სიტყვით გამოსვლისას ხაზგასმით ისაუბრა პოსტიდან მისი გადადგომის მიზეზებზე:
“დღეს, ჩვენ ვერთიანდებით საქართველოსთვის, მაგრამ არავის წინააღმდეგ. სიმართლის ძალა მდგომარეობს იმაში, რომ ჩვენ არ უნდა ვიცხოვროთ ილუზიაში. ხანდახან პოლიტიკური კულტურა, პოლიტიკური ველი გვაცხოვრებს ამ ილუზიაში, მაშინ როდესაც პოლიტიკურ ძალებს, პარტიებს შორის კინკლაობა, ჩხუბი შეიძლება ვიღაცას ეგონოს, რომ რაიმეს პროგრესის მომტანია ქვეყნისთვის.
გადავდექი იმიტომ, რომ, და ამას ვამბობ გულწრფელად, 8-წლიანი მმართველობის შემდგომ, მმართველი პარტია თავის, თუნდაც, ყველაზე დიდ მიღწევებს ადარებდა 10-15 წლის წინანდელ რეალობას და ამით პერსპექტივას, განვითარების პერსპექტივას უკლავდა ჩვენს ქვეყანას.
მე გადავდექი იმიტომ, რომ ერთ კონკრეტულ მომენტში ჩემთვის სრულიად გასაგებად და აშკარად პოლიტიკურმა პარტიამ მისი პარტიული ინტერესები დააყენა სახელმწიფო ინტერესებზე მაღლა. გადავდექი იმიტომ, რომ პარტია დაშორდა ჩვენი რიგითი მოქალაქეების რეალურ პრობლემებს.,” – აღნიშნა გიორგი გახარიამ სიტყვით გამოსვლისას.
ჟურნალისტებთან კომენტარში ყოფილმა პრემიერმა აღნიშნა, რომ პარტია მიიღებს მონაწილეობას არჩევნებში და შეეცდება მაქსიმალური მხარდაჭერის მიღებას:
“არასოდეს არავის პროექტი არ ვყოფილვარ და მით უმეტეს მომავალშიც არ ვიქნები.
ჩვენი მიზანი იქნება არჩევნებში მონაწილეობა და ამომრჩევლების მაქსიმალური მხარდაჭერის მიღება,” – განაცხადა გიორგი გახარიამ.