თბილისში გამართული საპროტესტო აქციების შემდეგ “რიონის მცველები” ნამახვანჰესის მშენებლობის წინააღმდეგ პროტესტს ახლა გუმათში აგრძელებენ და უკვე მე-2 დღეა ისევ პირისპირ დგანან აქციის მონაწილეები და სამართალდამცავები. ადგილზე სიტუაცია რამდენჯერმე დაიძაბა და დღის ბოლოს შინაგან საქმეთა სამინისტრო გამაფრთხილებელ განცხადებას ავრცელებს:
“შინაგან საქმეთა სამინისტრო, გუმათში შეკრებილ ნამახვანჰესის მშენებლობის მოწინააღმდეგე მოქალაქეებს მოუწოდებს, დაიცვან კანონის მოთხოვნები და შეინარჩუნონ სიმშვიდე. პოლიცია იმოქმედებს მისთვის მინიჭებული მანდატის ფარგლებში და რეაგირებას მოახდენს კანონდარღვევის ნებისმიერ ფაქტზე.
შინაგან საქმეთა სამინისტროს თანამშრომლები უსაფრთხოების ზომებიდან გამომდინარე და მოვლენების ხელოვნურად ესკალაციის თავიდან არიდების მიზნით, რიონის ხეობაში მობილიზებული არიან და საზოგადოებრივ წესრიგს იცავენ.
შინაგან საქმეთა სამინისტრო კიდევ ერთხელ მოუწოდებს შეკრებილებს, დაემორჩილონ პოლიციის კანონიერ მოთხოვნებს და არ გასცდნენ გამოხატვის თავისუფლების კანონით დასაშვებ ფარგლებს,” – ნათქვამია განცხადებაში.
