საპარლამენტო ფრაქცია “ლელო – პარტნიორობა საქართველოსთვის” წევრმა არმაზ ახვლედიანმა, პლენარულ სხდომაზე სიტყვით გამოსვლისას ყურადღება გაამახვილა, საქართველოს დამოუკიდებელი რესპუბლიკის შეიარაღებული ძალების მთავარსარდლის, გენერალ გიორგი კვინიტაძის ნეშტი საფრანგეთიდან საქართველოში გადმოსვენების ფაქტს და კონკრეტული შედარებები მოიყვანა ქვეყანაში მიმდინარე პროცესებთან მიმართებაში:
„დიდი გენერალი დაუბრუნდა საქართველოს და დიდი მეომრები დახვდნენ მას აქ ქართულ მიწაში, მათ შორის ერთი ყველასთვის ცნობილი 24 წლის შალვა ერისთავი ვერის პარკშია დაკრძალული.
სულ ვფიქრობ, მას რა მოეწონებოდა ჩემს საქციელში. ჩემი აზრით, ყველაზე გამორჩეულ, ყველაზე დიდ ქართველს, რომელიც ჩემთვის გაცოცხლებული შალვა ერისთავია, ეს არის მერაბ კოსტავა. ვეკითხები საკუთარ თავს, როცა ბათუმში საუცხოო ბულვარი განადგურდა, ეს მოეწონებოდა ან ერთს ან მეორეს? შემაქებდნენ?
როცა ჩვენს გურიაში, აჭარა-გურიის მთებში, ბახმარო და გომის მთა უმოწყალოდ განადგურდა, ამას მოგვიწონებდნენ ისინი ? ან ხვალ რომ უნდა შეიკრიბოს მოსამართლეთა კონფერენცია და დაადასტუროს, რომ ისე იქნება როგორც გვსურს, მოგვიწონებნენ? ნუთუ ამისთვის შეეწირა საუკეთესო ქართველთა დიდი ჯგუფი სამშობლოს?“ – განაცხადა არმაზ ახვლედიანმა.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
