“პროტესტი გაგრძელდება, ვიდრე ეს ყველაფერი არ გადაწყდება ხალხის სასარგებლოდ” – ვარლამ გოლეთიანი

ნამახვანჰესის მოწინააღმდეგეებმა ხელისუფლებას კონკრეტული მოთხოვნები წაუყენეს. მათი მოთხოვნაა, კომპანია “ENKA” რიონის ხეობიდან გავიდეს, შეწყდეს ნამახვანჰესის მშენებლობის სამუშაოები, ასევე, გაფორმდეს მორატორიუმი, გადადგეს ეკონომიკის მინისტრი ნათია თურნავა, დადგეს მისი სამართლებრივი პასუხისმგებლობის საკითხი იმ პირებთან ერთად, რომლებიც ნამახვანჰესის პროექტში მონაწილეობენ. აღნიშნულ საკითხებზე კომენტარს საპროტესტო აქციის ერთ-ერთი ორგანიზატორი, ვარლამ გოლეთიანი აკეთებს. მისი განცხადებით, აქციის მონაწილეები საპროტესტო მსვლელობის მოწყობას გეგმავენ და სამართლიან პროტესტს მანამ არ შეაჩერებენ, სანამ ყველაფერი ხალხის ინტერესების სასარგებლოდ არ გადაწყდება:

“ვაპირებთ, რომ მოვაწყოთ მსვლელობა. ჩვენ იმას არ ვანიჭებთ განსაკუთრებულ მნიშვნელობას, სად გადავადგილდებით და რას გადავკეტავთ, მთავარი არის ხელისუფლების ის არაგონივრული ნაბიჯი, რაც იდგმება უკვე 209 დღეა ჩვენი მისამართით, პრაქტიკულად თუკი გაგრძელდება იგივე, ჩვენ ამ პროტესტს არ შევწყვეტთ, ბუნებრივია, იმიტომ, რომ კიდევ ერთხელ ვამბობ, არის სამართლიანი და არგუმენტირებული პროტესტი, ამიტომ გაგრძელდება, ვიდრე ეს ყველაფერი არ გადაწყდება ხალხის სასარგებლოდ. ამიტომ ახლა, 12 საათისთვის ჩვენ უკვე გავაკეთებთ ამ სცენიდან განცხადებას და ვინც ვიქნებით აქ შეკრებილები მოვუწოდებთ დედაქალაქის მოსახლეობას, რომ გამოვიდნენ და დავდგეთ ერთად ამ სამართლიან ბრძოლაში. ვიტყვით, რომელი მიმართულებით დავიძვრებით, უშულაოდ როცა განვაცხადებთ ამ ყველაფერს სცენიდან“, – აცხადებს ვარლამ გოლეთიანი.

აქციის ორგანიზატორების განცხადებით, თუკი არ დაკმაყოფილდება მოთხოვნები, დაგეგმილია თბილისისა და სხვა ქალაქების პიკეტირება.