“დაზარალებულთა თანხმობა აუცილებელია სამართლებრივად გამართული ამნისტიისათვის” – გრიგოლ გეგელია

ოპოზიციის წარმომადგენლები მხარს არ უჭერენ 20 ივნისის მოვლენებზე უმრავლესობის ამნისტიის პროექტს, რომლის მიხედვითაც ამნისტია სურვილის შემთხვევაში ყველა ბრალდებულ პირს ეხება. პარტიის “ლელო საქართველოსთვის” პოლიტიკური საბჭოს წევრი, გრიგოლ გეგელია აღნიშნულ საკითხზე კომენტირებისას კი დამატებით აცხადებს, რომ მორალურად და სამართლებრივად გამართული ამნისტიისათვის აუცილებელია დაზარალებულთა თანხმობა:

“დაუშვებელია, მოხდეს ნებისმიერი შესაძლო ჰიპოთეტური დანაშაულის ამნისტირება და ჩვენ მივიჩნევთ, რომ დაზარალებულთა თანხმობა არის სრულიად მნიშვნელოვანი იმისათვის, რომ ადეკვატური, მორალურად და სამართლებრივად გამართული ამნისტია იქნას მიღებული. შესაბამისად, ჩვენ ვიმუშავებთ ამ იდეალით.

“ქართულ ოცნებას” უნდა გავაგებინოთ, რატომ არის აუცილებელი დაზარალებულთა თანხმობა და იმავე დროს, რატომ არის დაუშვებელი, რომ ნებისმიერი შესაძლო ჰიპოთეტური დანაშაული ამგავარად წინსწრებით იქნას ამნისტირებული. ჩვენ ვამბობთ, რომ კონკრეტული სისხლის სამართლებრივი დევნის დროს კონკრეტული მუხლებით უნდა მოხდეს ამნისტირება“, – აცხადებს გრიგოლ გეგელია.

ავტორი
ნატალი ბაკურაძე