სახელმწიფო ინსპექტორის სამსახურმა, ინსტიტუციური გაძლიერებისა და საქმიანობის ეფექტიანობის გაზრდის მიზნით დღეს, ქალაქ ბათუმში, ოფისი გახსნა, შესაბამისად სამსახურის საგამოძიებო დეპარტამენტში ახალი სტრუქტურული ერთეული – აჭარის ავტონომიური რესპუბლიკის სამმართველო შეიქმნა, რომელიც აჭარის ავტონომიური რესპუბლიკისა და გურიის რეგიონის ტერიტორიაზე მოხელეთა მიერ ჩადენილ ძალადობრივ დანაშაულებს გამოიძიებს.
ახალი ოფისი სახელმწიფო ინსპექტორის პირველმა მოადგილემ გიორგი გამეზარდაშვილმა გახსნა. ღონისძიებას საგამოძიებო დეპარტამენტის უფროსის მოადგილე გიორგი გვარაკიძეც ესწრებოდა.
აჭარის ავტონომიური რესპუბლიკის სამმართველოს ოფისში, რომელიც ქ. ბათუმში, გიორგი მაზნიაშვილის ქ. №54-ში იფუნქციონირებს, გათვალისწინებულია არასრულწლოვანთა და შეზღუდული შესაძლებლობების მქონე პირთა საჭიროებები. სისხლის სამართლის საქმის გამოძიების პროცესში მონაწილე მოწმე და მსხვერპლი ბავშვების უფლებებისა და ჭეშმარიტი ინტერესების დასაცავად, მოწყობილია ბავშვზე მორგებული გარემო. ოფისის ინფრასტრუქტურა ადაპტირებულია შშმ პირების საჭიროებებზე. ცალკე სივრცეებია გამოყოფილი მოწმეთა გამოკითხვისა და პირის ამოცნობის ჩასატარებლად.
სახელმწიფო ინსპექტორის სამსახურის საგამოძიებო დეპარტამენტის აჭარის ავტონომიური რესპუბლიკის სამმართველოს ირაკლი კბილაშვილი უხელმძღვანელებს, რომელიც სახელმწიფო ინსპექტორის სამსახურში 2019 წლის 1-ელი ნოემბრიდან გამომძიებლის, ხოლო შემდგომ საგამოძიებო დეპარტამენტის დასავლეთის სამმართველოს უფროსის პოზიციას იკავებდა. სამმართველოში ოთხი გამომძიებლის შტატია გათვალისწინებული.
აჭარის ავტონომიურ რესპუბლიკაში დამატებითი ოფისის ამოქმედება მნიშვნელოვნად შეუწყობს ხელს აღნიშნულ ტერიტორიაზე ჩადენილ სავარაუდო დანაშაულებზე დროულ რეაგირებას, საგამოძიებო და საპროცესო მოქმედებების დაუყოვნებლივ ჩატარებას და თანამშრომელთა რესურსის უფრო ეფექტიანად გადანაწილებას. ამის შესახებ სახელმწიფო ინსპექტორის პირველი მოადგილე, გიორგი გამეზარდაშვილი კომენტარს აკეთებს:
„სახელმწიფო ინსპექტორის სამსახური აქტიურად მუშაობს უწყების ინსტიტუციურ გაძლიერებაზე. დღეს სახელმწიფო ინსპექტორის სამსახურის დღეა და ქალაქ ბათუმში სამსახურის ოფისი ამოქმედდა, რომელიც აჭარის ავტონომიური რესპუბლიკისა და გურიის რეგიონის ტერიტორიაზე ჩადენილ ძალადობრივ სამოხელეო დანაშაულებს გამოიძიებს.
აღნიშნული ოფისის მოქმედება მნიშვნელოვნად გაზრდის სამსახურის ეფექტიანობას, ხელს შეუწყობს, საგამოძიებო და საპროცესო მოქმედებების დაუყოვნებლივ ჩატარებას და ადგილობრივი მოსახლეობისთვის სამსახური კიდვ უფრო ხელმისაწვდომი გახდება“, – აცხადებს გიორგი გამეზარდაშვილი.
ინფორმაციისთვის: დღემდე, სახელმწიფო ინსპექტორის სამსახურის საგამოძიებო დეპარტამენტი, მხოლოდ ორი ქალაქიდან – თბილისიდან და ქუთაისიდან – აწარმოებდა გამოძიებას ქვეყნის მასშტაბით.
ავტორი
ნატალი ბაკურაძე
