“ნიკა მელია ამ ბრძოლიდან გამოვა ღირსეულად, გამარჯვებული!” – გიორგი კონდახიშვილი

ნიკა მელიას ადვოკატმა გიორგი კონდახიშვილმა სასამართლო პროცესის დაწყებამდე აღნიშნა, რომ არავითარი მოლოდინი არ გააჩნიათ და ექნებათ შუამდგომლობა, რომ გადაიდოს პროცესი სანამ სასამართლო და პროკურატურა ხელისუფლებისგან არ მიიღებს დირექტივებს:

,,ეს არის მორიგი პროცესი, რომლისგანაც არავითარი მოლოდინი არ გაგვაჩნია. არ ვაპირებთ თავის მოტყუებას და სერიოზულ მტკიცებულებებზე, სამართლებრივ არგუმენტებზე საუბარს, ვინაიდან თავიდან ბოლომდე არის პოლიტიკური პროცესი. ამას უკვე ხელისუფლებაც აღიარებს და პირდაპირი მნიშვნელობით აქვთ ინიცირებული კანონპროექტი, რომლითაც ადრე თუ გვიან ეს საქმე უნდა შეწყდეს.

რაც შეეხება აღკვეთის საკითხს, თავიდან ბოლომდე სამართლებრივი ინსტრუმენტი არის ხელისუფლების ხელში. მათ ნებისიერ დროს შეუძლიათ, თუნდაც ამ სასამართლო პროცესზე, იშუამდგომლონ და დაასრულონ ნიკა მელიას უკანონო პოლიტიკური პატიმრობა.

როგორც არ უნდა დასრულდეს ეს ან მომავალი პროცესები, ფაქტი არის ერთი: ნიკა მელია ამ ბრძოლიდან გამოვა ღირსეულად, გამარჯვებული. ნიკა მელია არის პრინციპული პოლიტიკოსი.

ჩვენ გვექნება შუამდგომლობა, რომ გადაიდოს სასამართლო პროცესი, სანამ სასამართლო და პროკურატურა არ მიიღებს მომავალში დირექტივას ხელისუფლებიდან, რა უნდა გააკეთონ“, – განაცხადა გიორგი კონდახიშვილმა.

ავტორი
ნინი ხიჯაკაძე