დღეს, “სტრატეგია აღმასენებლის” ოფისში, შარლ მიშელის დოკუმენტის კონკრეტული მუხლების განხილვის მიზნით გამართულ შეხვედრაზე, განხილული იყო ამნისტიის კანონთან დაკავშირებული საკითხებიც. შეხვედრის შემდეგ სალომე სამადაშვილმა კომენტარი გააკეთა ჟურნალისტებთან და აღნიშნა, რომ ამნისტიის კანონი შესაძლებელია გავრცელდეს მხოლოდ იმ ადამიანებზე, რომელთა მიმართ ბრალი უკვეა წაყენებული:
,,ამნისტია შეიძლება გავრცელდეს მხოლოდ და მხოლოდ კონკრეტულ მუხლებთან დაკავშირებით – ადამიანებზე, რომლებსაც უკვე აქვთ წაყენებული ბრალი.
დემონსტრანტების მხრიდან ეს არის თექვსმეტი ადამიანი და საუბარია სამ პოლიციელზე. თუმცა, ჩემი აზრი, მინდა კიდევ ერთხელ ვთქვა, მე მიმაჩნია, რომ ძალიან მნიშვნელოვანი პრინციპი რაც უნდა ჩაიდოს ამნისტიის ამ ასე ვთქვათ კანონპროექტში, ეს არის პრინციპი დაზარალებულის თანხმობის ამნისტირებაზე.
ეს ამნისტიის კანონი ვერანაირად ვერ გავრცელდება მომავალში ჩატარებულ ან გამოძიებაზე ან დადგენილ დამნაშავეებზე“, – განაცხადა სალომე სამადაშვილმა.
ავტორი
ნინი ხიჯაკაძე
