შალვა ამირანაშვილის სახელობის მუზეუმი რეაბილიტაციას საჭიროებს და იწყება სახელმწიფო სარემონტო სამუშაოები. ამ გადაწყვეტილების შესახებ საზოგადოებას ინფორმაცია კულტურის მინისტრმა, თეა წულუკიანმა უშუალოდ ამირანაშვილის მუზეუმიდან მიაწოდა:
„ოთხი ჯგუფი ჩაბარდება ოთხ დირექტორს, რომლებიც შექმნიან დირექტორატს, რომელსაც საქმიანობაში კოორდინაციას, რა თქმა უნდა, გაუწევს გენერალური დირექტორი, ბატონი ლორთქიფანიძე. მათ ექნებათ რწმუნება სამინისტროსგან, რომ, პირველ რიგში, ფონდების, კოლექციების ვითარება შეისწავლონ.
„იუნესკომ“ დადებითად უპასუხა ჩვენს თხოვნას და არაერთი პროცედურის გავლის შემდეგ, უკვე ველოდებით მათ ექსპერტებს, რომლებიც ქართველ პროფესიონალებთან ერთად საგანძურში იმუშავებენ და დაადგენენ, რა მდგომარეობაშია გაერთიანებული და ძლიერი საქართველოს სიმბოლო – ხახულის დიდი ხატი. სწორედ ეს ჯგუფი დაადგენს, რა ვითარებაშია ეს ექსპონატები.
პარალელურ რეჟიმში მიმდინარეობს ამ შენობის კვლევა, რაც არ იქნება მხოლოდ ვიზუალური. ეს იქნება ექსპერტიზა, კონსტრუქციული, სიღრმისეული, ასევე ჩატარდება გეოლოგიური და ჰიდროლოგიური კვლევები და სანამ ეს დასკვნები არ გვექნება, ვერ გვეცოდინება, ეს შენობა ექვემდებარება რესტავრაციას, გამაგრებას თუ არა“, – განაცხადა თეა წულუკიანმა.
ავტორი
ნატალი ბაკურაძე
