„განგაშის ზარი უნდა შემოვკრათ“ – დაავადებათა კონტროლის ეროვნული ცენტრის ხელმძღვანელი- ამირან გამყრელიძე, ქვეყანაში შექმნილ ვითარებას ამ სიტყვებით აფასებს.
როგორც ამირან გამყრელიძე აცხადებს, იმ შემთხვევაში თუ მოქალაქეები რეკომენდაციებს არ დაიცავენ, ქვეყანაში მესამე ტალღა გარდაუვალია:
„სამწუხაროდ, ეპიდსიტუაცია ქვეყანაში თანდათან უარესდება, ეს ხდება ბოლო ორი კვირა, ოცი დღის განმავლობაში. ხაზს ვუსვამ არ ყოფილა ნახტომისებური ზრდა, მაგრამ ახალი შემთხვევების დინამიური მატება ყოველდღიურად აღინიშნება და დღეს, დილისთვის გვქონდა პატარა ნახტომი, როდესაც პირველად, ბოლო თებერვალ-მარტის განმავლობაში ახალი შემთხვევის რიცხვი თითქმის 900-მდე ავიდა, რაც რა თქმა უნდა საყურადღებოზე მეტია.
შეიძლება ითქვას, რომ პირველი განგაშის ზარი უნდა შემოვკრათ. ეპიდსიტუაცია ყველა ინდიკატორის მიხედვით უარესდება, 7 დღის განმავლობაში დადებითობის მაჩვენებელი 2%-ს ასცილდა, დღევანდელი დადებითობის მაჩვენებელი 3,65%-ია. ეს ყველაფერი მიუთითებს, რომ ინფექციის ცირკულაცია უფრო ინტენსიურია ქვეყანაში.
ამასთან ერთად, გამოიკვეთება 10 მეტნაკლებად მოზრდილი კლასტერი რეგიონებში, რომელთა შორისაა: სამეგრელო, გურია, რაჭა-ლეჩხუმი, შიდა ქართლი.
როგორ უნდა შეკავდეს ეს ყოველივე? მოგეხსენებათ, ბევრ ქვეყანაში მესამე ტალღა უკვე დაიწყო და ჩვენც ამ საფრთხის წინაშე ვართ. რითი შეიძლება შეკავდეს გავრცელება? პირველ რიგში განსაკუთრებული დისციპლინით, ჩვენ ყველამ უნდა დავიცვათ ის მთავარი რეკომენდაციები და შეზღუდვები, რომლებიც ქვეყანაში მოქმედებს: პირბადის ტარება ყველგან, დისტანციისა და ჰიგიენური ნორმების დაცვა.
ყველაზე მთავარი კი თავშეყრის ადგილებისგან თავის არიდებაა, რაც გულისხმობს: ქორწილებზე, ჭირისუფლებზე და დიდ შეკრებებზე მისვლისგან თავის არიდებას, ამასთან ერთად მუშაობის დიდი ნაწილის დისტანციურ მეთოდზე გადაყვანას და რაც მთავარია, დაიწყოს ხალხის ინტენსიურად აცრა“, – განაცხადა ამირან გამყრელიძემ.
ავტორი
ნინი შონია
