კრისტიან დანიელსონის მედიაციით გამართული მოლაპარაკებების მეორე რაუნდის უშედეგოდ დასრულების შემდეგ, ოპოზიციური პარტიების წარმომადგენლებმა ,,ლეიბორისტული პარტიის’’ ოფისში დღეს პირველი საკონსულტაციო შეხვედრა გამართეს. შეხვედრაზე ოპოზიციური პარტიების ლიდერებმა 3 დღის წინ გამართული მოლაპარაკებების შესახებ იმსჯელეს და 15 მაისს დაგეგმილი აქციის სამოქმედო გეგმები განიხილეს.
საკონსულტაციო შეხვედრის დასრულების შემდეგ, ჟურნალისტებთან კომენტარი გააკეთა ,,ნაციონალური მოძრაობის’’ ერთ-ერთმა ლიდერმა, თინა ბოკუჩავამ. ბოკუჩავას თქმით, არსებობს საფრთხე იმისა, რომ საქართველოს შეუჩერდეს ფინანსური დახმარება ევროპის კავშირისა და ამერიკისგან.
,,15 მაისის აქციების მოსამზადებელ სამუშაოებთან დაკავშირებით, ბევრ საკითხთან მიმართებაში შევჯერდით და ასევე იმაზე თუ როგორ უნდა გაგრძელდეს მოლაპარაკებები, თუ ის საერთოდ უნდა გაგრძელდეს და რა ნაბიჯები უნდა გადადგას ამისთვის ოპოზიციამ.
შესაძლებელია საქართველოს, შეუჩერდეს იმ ფინანსური, მაკროეკონომიკური დახმარების მიღება, რასაც იღებს ევროპის კავშირისგან. იგივე საუბრებია დაწყებული ამერიკის კონგრესში, მაგრამ ჩვენ ყველაფერი უნდა გავაკეთოთ იმისთვის, რომ საქართველო არ გახდეს სანქციების სამიზნე, ნაცვლად ამისა, სანქციები უნდა დაეკისროს პირადად ბიძინა ივანიშვილსა და მის გარემოცვას’’, – განაცხადა თინა ბოკუჩავამ.
15 მაისს ყველას აქციაზე გამოსვლისკენ მოუწოდა ,,ლეიბორისტული პარტიის’’ ლიდერმა, შალვა ნათელაშვილმა.
,,15 მაისს მე მოვუწოდებ სრულიად საქართველოს, გადავდოთ ყველა პირადი სამსახურეობრივი და საზოგადოებრივი საქმე. 15 მაისს გვეძახის სამშობლო, გვეძახის ჩვენი ქვეყნის მომავალი, გვეძახის ჩვენი ისტორია და ყველანი გავმწკრივდეთ რუსთაველის პროსპექტზე. შეიძლება ეს დღე იყოს 26 მაისის გამარჯვების ტოლფასი თარიღი სამომავლოდ’’, – განცხადა შალვა ნათელაშვილმა.
შეგახსენებთ, რომ ოპოზიციური პარტიები 15 მაისს საპროტესტო აქციას გეგმავენ. აქციის ჩატარების თარიღი 20 მარტს, მოლაპარაკებების პირველი რაუნდის უშედეგოდ დასრულების შემდეგ დაანონსეს.
ავტორი
ნინო დავითაძე
