“ნაც-აქტივისტებს არც პოზნერი აინტერესებთ, სინამდვილეში, არც აფხაზეთი და სამაჩაბლო” – მამუკა მდინარაძე

რუსეთიდან საგანგებოდ, საკუთარი დაბადების დღის აღსანიშნავად ჩამოსულმა ჟურნალისტმა,  ვლადიმერ პოზნერმა, ასევე მის მიერ მოწვეულმა რუსული დასისა და მედიის წარმომადგენებმა, დღეს დილით დატოვეს საქართველოს ტერიტორია, მწვავე საპროტესტო აქციის შემდეგ. ფრაქცია ,,ქართული ოცნების” თავმჯდომარემ, მამუკა მდინარაძემ მომხდარი ფაქტის შეფასებისას განაცხადა, რომ ,,ნაციონალური მოძრაობის” აქტივისტებს არც პოზნერი აინტერესებთ, არც სამაჩაბლო და აფხაზეთი:

,,ვიმსჯელოთ საერთოდ ავკრძალოთ თუ არა რუსეთის ნებისმიერი მოქალაქის შემოშვება საქართველოში, რომელთაც სააკაშვილმა ომის შემდეგ სავიზო რეჟიმი ცალმხრივად გაუუქმა. ოღონდ მანამდე უნდა ვიმსჯელოთ, მაგალითად, ,,ნაციონალური მოძრაობის” მომხრე პოლიტიკოსი ჟიგიმანტასი შემოვუშვათ თუ არა საქართველოში, რომელმაც რამდენიმე კვირის წინ პრაქტიკულად იგივე თქვა, რაც თავის დროზე პოზნერმა ოკუპირებულ ტერიტორიებთან მიმართებაში.

უნდა დავაყენო საკითხი: ახალგორის და კოდორის რუსეთისთვის გადამფორმებელი პოლიტიკური ძალა უნდა იყოს და უნდა არსებობდეს თუ არა ამ ქვეყანაში.

ეს ყველაფერი არის ფსევდოპატრიოტიზმით შეფუთული სამარცხვინო ისტერია. ნაც-აქტივისტებს არც პოზნერი აინტერესებთ, სინამდვილეში, არც აფხაზეთი და სამაჩაბლო. მათ სრული ისტერია აქვთ, რადგან ქვეყნის შიგნით და გარეთაც გამარგინალდნენ. ერთადერთი, რაც დარჩენიათ არის ქვეყანაში მუდმივი რყევებისა და დესტრუქციის მცდელობა“,- განაცხადა მამუკა მდინარაძემ.

ავტორი
ნინი ხიჯაკაძე