,,ლეიბორისტული პარტიის” ლიდერმა, შალვა ნათელაშვილმა ამერიკელ მეგობრებს მადლობა გადაუხადა, რომ ამ ურთულეს დროს დგანან საქართველოს გვერდით. ოპოზიციონერმა ლიდერმა აღნიშნა, რომ დემოკრატიული არჩევნები და მრავალპარტიული კოალიციური მთავრობა არის გამოსავალი, ჩვენი ქვეყნის გადარჩენა და გაყვანა დიდ მსოფლიო განვითარებაში:
,,მეგობრებო, მინდა დავიწყო მოლოცვით სრულიად საქართველოზე. გუშინ აშშ-ს სენატში შედგა ისტორიული სხდომა, სადაც მთელი მსოფლიოს გასაგონად გაცხადდა ჩვენი დიდი ამერიკელი მეგობრების პოზიცია, რომ ისინი ამ ურთულეს დროს ისევ და ისევ დგანან საქართველოსთან და ქართველ ხალხთან ოლიგარქიული რეჟიმის წინააღმდეგ ბრძოლაში. დიდი მადლობა კიდევ ერთხელ მათ.
ჩვენც, რა თქმა უნდა, მაქსიმალურად უნდა ვიმოქმედოთ, რათა დამთავრდეს ბოროტება პუტინის ფილიალის სახით, რომელსაც წარმოადგენს დღევანდელი ივანიშვილის რეჟიმი.
დღეს საქართველოს საკონსტუტიციო სასამართლომ დაარეგისტრირა ჩვენი სარჩელი ჩემთვის სადეპუტატო უფლებამოსილების შეწყვეტის შესახებ, რის თაობაზეც საქართველოს უკანონო ე.წ. პარლამენტმა რამდენიმე ხნის წინ უარი გვითხრა.
ეს ცოდვით, ქართველი ხალხის უბედურებით, ძალადობით, ყაჩაღობით, დემოკრატიის ფეხქვეშ გათელვით შექმნილი ვაიორგანო არ უნდა დარჩეს ასპარეზზე. ის არ უნდა შედგეს, ის უნდა დაიშალოს, აღებული ხელფასები და პრემიები, მილიონები უკან უნდა დააბრუნონ, აი იმ მილიონერებმა, რომლებიც იქ შევიდნენ. ნდობის ბოროტად გამოყენებით, გაყალბებით და ძალადობით.
ჩვენც, ოპოზიციამ უარი უნდა ვთქვათ ამ პარლამენტში მოღვაწეობაზე, კატეგორიულად დავსვათ საკითხი, რომ ჩატარდეს ახალი არჩევნები დემოკრატიული, ჩამოყალიბდეს მრავალპარტიული კოალიციური მთავრობა. აი ეს არის გამოსავალი, ჩვენი ქვეყნის გადარჩენა და ჩვენი ცივილიზაციის გაყვანა იმ დიდ მსოფლიო განვითარებაში, სადაც ჩვენი კანონიერი ადგილი ყოველთვის გვქონდა, გვაქვს, გვექნება და ჩვენ მას დავიბრუნდებთ, ვინც არ უნდა შეეცადოს ამის წართმევას“, – განაცხადა შალვა ნათელაშვილმა.
ავტორი
ნინი ხიჯაკაძე
