ველური ბუნების ეროვნული სააგენტო კრწანისის ტყეპარკის მობინადრე ფრინველების შესახებ საინტერესო მასალების გამოქვეყნებას აგრძელებს. ამჯერად გაიცანით – ჩიტბატონა (European goldfinch) – Carduelis carduelis.
ბუდეს იკეთებს ხეზე ან ბუჩქზე. წელიწადში მრავლდება ორჯერ: პირველად – მაისის მეორე ნახევარში, მეორედ – ივლისში. დებს 4-5 კვერცხს.
სხეულის სიგრძე: 12-13 სმ. დამახასიათებელია სხეულის ნაირგვარი შეფერილობა; თავის ზედა მხარე, ფრთები და კუდი შავია; ლოყები და მუცელი – თეთრი; ნისკარტის ირგვლივ აქვს წითელი განიერი არშია, ზურგი და გვერდები ყავისფერია. ფრთებზე აქვს დიდი ყვითელი ლაქები, მომქნევების წვერებზე კი – თეთრი წინწკლები. ახალგაზრდა ფრინველი მორუხო შეფერილობისაა, მუქი ლაქებით.
მისი ჰაბიტატია სხვადასხვა ტიპის ტყეები, ბაღები და პარკები.
IUCN-ის სტატუსი:LC