საქართველოს მთავრობის მეთაური, ირაკლი ღარიბაშვილი ქვეყანაში კორონავირუსის გავრცელების პრევენციული ღონისძიებების შეფასებისას ყურადღებას ამახვილებს იმ ფაქტზე, რომ მოსახლეობის მხრიდან შემცირებულია პირბადის ტარების მაჩვენებელი:
“მოგეხსენებათ, რომ ჩვენ მთელი რიგი შეზღუდვები მოვხსენით, თუმცა ბოლო დღეებში ჩვენ ვაკვირდებით დინამიკას და შემთხვევების გარკვეული მატება შეინიშნება. ასევე, საზოგადოების მხრიდან შეინიშნება ყურადღების მოდუნება და რეკომენდაციების უგულებელყოფა. ბოლო დღეებში ცნობილი გახდა, რომ პირბადის ტარების მაჩვენებელი საგანგაშოდ დაეცა, რაც კატეგორიულად დაუშვებელია.
მე მინდა თხოვნით მივმართო მოსახლეობას, რომ ეს ელემენტარული, მარტივი წესი დავიცვათ ყველამ და არ დავუშვათ ქვეყანაში მესამე ტალღის განვითარება.
ჩვენ ვაწარმოებთ და მეც ინტენსიურად ვარ ჩართული მოლაპარაკებებში, როგორც უშუალოდ ვაქცინის მწარმოებლებთან, ისე პარტნიორ ქვეყნებთან. ძალიან მალე ველოდებით ვაქცინის პირველ პარტიას, როგორც მინისტრმა აღნიშნა, ამის თაობაზე. სანამ დაიწყება ვაქცინაცია, ძალიან მნიშვნელოვანია, ვიყოთ განსაკუთრებით ყურადღებით, რომ ხელი არ შეეწყოს ვირუსის გავრცელებას და არ გვაიძულოს გარკვეული შეზღუდვები დავაბრუნოთ,” – განაცხადა ირაკლი ღარიბაშვილმა.
