თბილისის მერიის ინიციატივით სტუდენტების მხარდაჭერის პროგრამა გაფართოვდა და დაფინანსება თბილისში რეგისტრირებულ უფრო მეტ სოციალურად დაუცველ სტუდენტზე გაიცემა. აღნიშნული მხარდამჭერი პროგრამის თაობაზე დედაქალაქის მერმა თბილისის მთავრობის სხდომაზე ისაუბრა:
“ჩვენი ინიციატივით, სტუდენტების მხარდაჭერის პროგრამა გაფართოვდა და დაფინანსება თბილისში რეგისტრირებულ უფრო მეტ სოციალურად დაუცველ სტუდენტზე გაიცემა, რომელთაც სოციალურად დაუცველთა ერთიან ბაზაში 150 000 და უფრო ნაკლები ქულა აქვს.
ცვლილებების განხორციელებამდე, პროგრამის ფარგლებში ფინანსდებოდნენ სტუდენტები, რომელთა ოჯახების სარეიტინგო ქულა სოციალურად დაუცველთა ერთიან ბაზაში 70 000 ან უფრო ნაკლები იყო. ჩვენ გავზარდეთ სტუდენტების რაოდენობა და ახალგაზრდებს, წარმატებულ სტუდენტებს შესაძლებლობა მივეცით, ფინანსურად დავეხმაროთ და სწავლა დავუფინანსოთ.
გაზაფხულის სემესტრის დასაფინანსებლად, საბუთების მიღება პირველ მარტს დაიწყო და 31 მაისის ჩათვლით გაგრძელდება. პროგრამის ფარგლებში, სწავლა 2 000-ზე მეტ სტუდენტს დაუფინანსდება. ასე რომ, იაქტიურეთ და ჩვენ მაქსიმალურად დაგეხმარებით,” – განაცხადა კახა კალაძემ.
