დღეს მნიშვნელოვანი სარაგბო მატჩი გაიმართა პორტუგალიაში, სადაც ადგილობრივ ნაკრებს დაუპირისპირდა საქართველოს ნაკრები. თამაში ჩვენი ნაკრების გამარჯვებით დასრულდა:
“საფრანგეთის მიმართულების პირველი ნაბიჯი გადავდგით! #ბორჯღალოსნებმა რაგბი ევროპის ჩემპიონატის, 2023 წლის მსოფლიო თასის შესარჩევის პირველ მატჩში პორტუგალიას 16-29 სძლიეს.
აღსანიშნავია, რომ პირველ ტაიმში და მეორე ტაიმის პირველ ნახევარში მეტოქესთან გამკლავება შედარებით გაგვიჭირდა, თუმცა საბოლოოდ მაინც მოვახერხეთ სადავეების ხელში ჩაგდება და დამაჯერებელი გამარჯვების მოპოვება“, – ნათქვამია ფედერაციის მიერ გავრცელებულ ინფორმაციაში.
ინფორმაციისთვის: რაგბი ევროპის 2021-22 წლების ჩემპიონატი, ამავდროულად არის 2023 წელს საფრანგეთში გასამართი მსოფლიო თასის შესარჩევი ეტაპი. ამ ტურნირის გამარჯვებული და მეორე ადგილზე გასული ნაკრები მსოფლიოს ჩემპიონატის საგზურს ავტომატურად მოიპოვებენ, ხოლო მესამე ადგილზე გასული გუნდი ბრძოლას რეპეშაჟში გააგრძელებს.
