ჯანდაცვის მინისტრის მოადგილე, თამარ გაბუნია განმარტებებს აკეთებს ქვეყანაში ვაქცინის შემოტანასთან დაკავშირებით, თუ კონკრეტულად რა გადაწყვეტილებებია მიღებული AstraZeneca-სა და Pfizer-თან მიმართებაში:
“Covax პლატფორმაზე გამოქვეყნდა დაზუსტებული ალოკაციის სქემა AstraZeneca-სთვის და ასევე Pfizer-ისთვის. პირველ ეტაპზე ვაქცინების განაწილებისთვის 140 ქვეყანაა ალოკაციის სქემაში მოქცეული, აქედან 18 ქვეყანა არის იდენტიფიცირებული, მათ შორის, საქართველო, რომელიც გამონაკლისის წესით მიიღებს Pfizer-ის ვაქცინას.
რაოდენობა იქნება ის, რაც თავიდანვე იყო დაანონსებული – 29250 დოზა და სავარაუდოდ მარტის ბოლომდე გვეცოდინება, კონკრეტულად როდის შემოვა.
რაც შეეხება AstraZeneca-ს, მის ალოკაციაში მითითებულია 129600 დოზა, რომელიც ქვეყანამ უნდა მიიღოს მაისის ბოლომდე. საწყის კომუნიკაციაში, რომელიც თებერვალში გახდა ჩვენთვის ცნობილი, მითითებული იყო 144000 დოზაზე მეტი რაოდენობა – 315000 დოზამდე, ეს იყო პირველი ზღვარი, მაგრამ ეს რაოდენობა იყო განსაზღვრული ივნისის ბოლომდე. Covax-ი ამას აზუსტებს, რომ ის რაოდენობა, რომელიც გუშინდელ კომუნიკაციაშია აღწერილი, არ ნიშნავს საქართველოსთვის გამოყოფილი ვაქცინის დოზების შემცირებას,” – განაცხადა თამარ გაბუნიამ.
