“სტრატეგია აღმაშენებლის” ერთ-ერთი ლიდერი სერგო ჩიხლაძე ხელისუფლების მხრიდან დაანონსებულ 29250 დოზა ვაქცინის შემოტანას ეხმიანება და კონკრეტულ შეკითხვებს სვამს ხელისუფლების მისამართით:
“დაანოსდა, რომ თებერვალში 29250 დოზა (14600 ადამიანის სამყოფი) ვაქცინა შემოვა. უდაოდ კარგია და ყოველ დოზას მნიშვნელობა აქვს, მაგრამ საკმარისია ან ასეთი ტემპები დამაკმაყოფილებელია? ბევრია თუ ცოტა?
საჭიროა აიცრას ზრდასრული მოსახლეობის სულ ცოტა 60%, დაახლოებით 2 მილიონი ადამიანი. ანუ გვესაჭიროება 4 მილიონი დოზა (ასაცრელად 2 დოზაა საჭირო).
დაანონსებული ვაქცინა არის საჭირო რაოდენობის 0.7%;
რაოდენობასთან ერთად, საჭიროა დროის მჭიდრო მონაკვეთში მოხდეს მოსახლეობის ვაქცინაცია. ისრაელის ტემპებს რომ ვერ დავეწევით ცხადია. მთავრობის მიერ წარმოდგენილი კონცეფციით, სადღაც 1 წელი დაჭირდება მთლიან პროცესს. ამ შემთხვევაშიც კი საჭიროა კვირაში ავცრათ 70-დან 80 ათას ადამიანამდე და შესაბამისად გვჭირდება 70-80 000 დოზა.
თებერვალში შემოვა 1 კვირის სამყოფი დოზის დაახლოებით 1/3;
მთავრობის მიერ წარმოდგენილი გეგმით, უნდა ავცრათ სამედიცინო პერსონალის 65% (ყველა სხვა ჯგუფი 60%) – ეს არის 47 000 მედპერსონალი.
შემოსული დოზა ეყოფა ასაცრელი ჯანდაცვის მუშაკების ზუსტად 1/3-ს;
ყველა დოზა მნიშვნელოვანია, მაგრამ 100ჯერ მეტი აქტიურობა და მზადებაა საჭირო მთავრობის მხრიდან!” – წერს ფეისბუქის პირად გვერდზე სერგო ჩიხლაძე.